ރާއްޖެއަށް މިހާރު ކުރަމުން އަންނަ ވިއްސާރައިގައި ޅ. ކުރެންދޫއަށް ބޯކޮށް ވާރޭ ވެހި ގެއްލުންތަކެއް ލިބިއްޖެއެވެ.
ނެޝަނަލް ޑިޒާސްޓާ މެނޭޖްމަންޓް ސެންޓަރު (އެންޑީއެމްއޭ) އިން ބުނީ ރާއްޖެއަށް މިހާރު ކުރަމުންދާ ވިއްސާރާ އާ ގުޅިގެން ދެކުނުގެ އަތޮޅުތަކަށާއި މެދުރާއްޖެތެރެ އަދި އުތުރުގެ ބައެއް އަތޮޅުތަކަށް ވިއްސާރައިގެ އަސަރުކޮށްފައިވާ ކަމަށެވެ. ގެއްލުން ލިބޭ ރަށްތަކަށް އެހީތެރިކަން ފޯރުކޮށް ދިނުމުގެ މަސައްކަތް ވިލަރެސް ކުރަމުންދާ ކަމަށް ވެސް އެންޑީއެމްއޭ އިން ބުނެފައިވެއެވެ.
ހާލުގައި ޖެހުނު ފަރާތްތަކަށް ވަގުތީ ބޯހިޔާވަހިކަމާއި ކެއުން ބުއިމުގެ އެހީތެރިކަން ފޯރުކޮށްދިނުމުގެ މަސައްކަތް ކައުންސިލް އިދާރާތަކާ ގުޅިގެން މަސައްކަތް ކުރަމުން އަންނަ ކަމަށް އެންޑީއެމްއޭ އިން ބުންޏެވެ.
ކުރެންދޫއަށް ބޯކޮށް ވާރޭ ވެހި ރަށު ތެރޭގައި އެއްކޮށް ފެން ބޮޑުވެ، ފެން ހިއްކުމަށް ރަށުގައި ހުރި ޕަންޕު ބޭނުންކޮށްގެންނާއި ކޯރު ކަނޑައިގެން ފެން ހިންދުމުގެ މަސައްކަތް ދަނީ ކުރަމުންނެވެ. ފެން ހިންދުމުގެ މަސައްކަތުގައި އެމްއެންޑީއެފުން ވެސް ބައިވެރިވެއެވެ.
އެންޑީއެމްއޭ އިން ބުނީ ފެން ބޮޑުވެ، ގެއްލުން ލިބުނު ގެތަކުގެ ތެރެއިން ދިރިނޫޅެވޭ ހާލަތަށް ގޮސްފައިވާ ގެތައް ދެނެގަނެ، އެ ފަރާތްތަކަށް ބޭނުންވާ ވަގުތީ ބޯހިޔާވަހިކަމާއި ކެއުން ބުއިމުގެ އެހީތެރިކަން ފޯރުކޮށްދިނުމުގެ މަސައްކަތް ކުރަމުން އަންނަ ކަމަށެވެ.
ވިއްސާރައިގައި އައްޑޫ ސިޓީ ފޭދޫ ގެއެއްގެ ފުރާޅަށް ގެއްލުންވެ، ސީލިން އަށް ފެން އެޅުމުގެ ސީލިން ވަނީ ވެއްޓިފައެވެ. އަދި ދ. ބަނޑިދޫއަށް އައި ކޮޅިގަނޑެއްގައި ގެއެއްގެ ފުރާޅުގެ ބައެއް އެއްލާލި އިރު، ބަދިގެ ތެރޭގައި ފެން ބޮޑުވެ ހިފައި ގެންގުޅޭ ތަކެއްޗަށް ގެއްލުންވެފައިވެއެވެ.
އެ ގޭގައި ދިރިއުޅޭ ހަތް މީހުންނަށް ކައުންސިލުން ވަނީ އެހީތެރިކަން ފޯރުކޮށްދީފައެވެ. ކޮޅިގަނޑުގައި އެ ރަށުގެ އިތުރު ގެއެއްގެ ޓިނުގަނޑުން ބައެއް އެއްލާލިއެވެ.
