ބޭރުފައިސާގެ ގަވާއިދަށް ގެނެވުނު އިސްލާހަށް އެއްވެސް ބަދަލެއް ނުގެންނަވާނެ ކަމުގައި ރައީސް މުއިއްޒު ވިދާޅުވެއްޖެއެވެ.
ރައީސް މުއިއްޒު މިހެން ވިދާޅުވީ ސަރުކާރަށް އެއް އަހަރު ފުރުން ފާހަގަކުރުމަށް ޒުވާނުންގެ މަރުކަޒުގައި ބޭއްވުނު ޖަލްސާގައި ވާހަކަފުޅު ދައްކަވަމުންނެވެ. އަދި 500 ޑޮލަރު މާރުކުރުމަކީ ކޮންމެހެން ކުރަންޖެހޭނެ ކަމެއްކަމުގައިވެސް ރައީސް ވިދާޅުވިއެވެ.
"ވަރަށް ސާފުކޮށް މިދަންނަވަނީ ޤަވާޢިދު ބަދަލެއް ނުކުރާނަން، 500 ޑޮލަރު މާރުކުރައްވަން ޖެހިވަޑައިގަންނަވާނެ.
ޑޮލަރު މާރުކުރުމުގެ ގަވާއިދަށް ބަދަލު ގެނައުމަށް ބައެއް ވިޔަފާރިވެރިން ކުރަމުންދާ ޑިމާންޑްތަކަށް މޭރުން ކުރައްވަމުން ރައީސް ވިދާޅުވިއެވެ.
ރައީސް ވިދާޅުވި ގޮތުގައި ސަރުކާރުން މި ގަވާއިދަށް ބަދަލު ގެނައުމަށް ނިންމެވި މައިގަނޑު ސަބަބަކީ ތެލާއި ކާބޯތަކެތި ގަތުމަށް ކުރަންޖެހޭ ޚަރަދުތައް އިންތިހާއަށް ބޮޑުވެފައިވުމެވެ. އަދި ދައުލަތަށް ލިބޭ އާމްދަނީން މި ޚަރަދުތަކަށް ދެކޮޅު ނުޖެހޭކަން ފާހަގަކުރެއްވިއެވެ. އެމަނިކުފާނު އިތުރަށް ވިދާޅުވި ގޮތުގައި ސަރުކާރުން މާރުކުރަން އެދެނީ ރާއްޖެއަށް ވަންނަ ބޭރުފައިސާގެ އެންމެ 20 އިންސައްތައެވެ.
ގަވާއިދަށް އިތުރު ބާރެއް ދިނުމުގެ ގޮތުން ޚާއްސަ ފޮރެކްސް ޤާނޫނެއް މަޖިލީހުން ފާސްކޮށްދޭނެ ކަމަށާއި، ސަރުކާރުން 100 ޕަސެންޓް ރައްޔިތުންނާ އެކުގައި ކަމަށް ރައީސް ވަނީ ވިދާޅުވެފައެވެ.
އެމްއެމްއޭއިން މިހާރު އަމަލުކުރަން ފަށާފައިވާ ބޭރުފައިސާ ގަނެވިއްކުމުގެ އައު ގަވާއިދަކީ 1987 އިން ފެށިގެން އަމަލުކުރަމުން އައި ގަވާއިދު އައުކޮށްފައިވާ އިސްލާހެކެވެ. މި އައު ގަވާއިދުގެ މަޤްސަދަކީ ބޭރުފައިސާ ގަނެވިއްކުމުގެ ވިޔަފާރި މިހާރަށްވުރެ ހަރުދަނާކޮށް، ޒަމާނީ އުސޫލުތަކަކަށް ބަދަލުކުރުމެވެ.
މި ގަވާއިދުގެ ދަށުން ފަތުރުވެރިކަމުގެ ޚިދުމަތްދޭ ތަންތަން ވަނީ ދެ ގިންތިއަކަށް ބަހާލެވިފައެވެ. އޭގެ ތެރެއިން އޭ ކެޓަގަރީގައި ހިމެނެނީ ރިސޯޓުތަކާއި، ބޮޑެތި ހޮޓާތަކާއި ޓުއަރިސްޓް އުޅަނދުތަކެވެ. މި ތަންތަނުން ކޮންމެ ފަތުރުވެރިއަކަށް 500 ޑޮލަރުގެ ރޭޓުން ބޭންކަށް ރުފިޔާ މާރުކުރުން ލާޒިމްކުރެއެވެ.
