ހަފުތާ ބަންދު ނުވަތަ ރަސްމީ ބަންދު ދުވަސްތަކުގައި އުއްތަމަ ފަނޑިޔާރާއި ކޯޓުތަކުގެ އިސް ފަނޑިޔާރުން ރަށުން ބޭރަށް ނުވަތަ ރާއްޖެއިން ބޭރަށް ވަޑައިގަންނަވާނަމަ އެކަން ޖޭއެސްސީއަށް އަންގަންޖެހޭ ގޮތަށް ހަމަޖައްސާ، ޖުޑީޝަލް ސާވިސް ކޮމިޝަން (ޖޭއެސްސީ) އިން ނެރުނު ސާކިއުލާއެއްގައި އެކައިން އިއުލާން ކޮށްފިއެވެ.
ގާނޫނުއަސާސީ އާއި ފަނޑިޔާރުންގެ ގާނޫނު އަދި ފަނޑިޔާރުންގެ ސުލޫކީ މިންގަނޑުގައި ބަޔާންކޮށްފައިވާ ގޮތުން، ކޮންމެ ފަނޑިޔާރަކުވެސް އެ މަގާމުގެ މަސައްކަތަށް އޭނާގެ ހުރިހާ ވަގުތެއް ހުސްކުރަންޖެހެއެވެ. އެހެންކަމުން، ހަފުތާ ބަންދާއި ރަސްމީ ބަންދު ދުވަސްތަކުގައިވެސް ފަނޑިޔާރުން އައްޔަންކޮށްފައިވާ ކޯޓު/ދާއިރާ ނުވަތަ ރާއްޖެއިން ބޭރަށް ވަޑައިގަންނަވާނަމަ އެކަން އަންގަންޖެހޭނެއެވެ.
އުއްތަމަ ފަނޑިޔާރާއި ހައި ކޯޓުގެ އިސް ފަނޑިޔާރާއި ދަށު ކޯޓުތަކުގެ އިސް ގާޒީން އަދި އިސް މެޖިސްޓްރޭޓުން ރަށުން ބޭރަށް ވަޑައިގަންނަވާނަމަ ޖޭއެސްސީއަށް އަންގަންޖެހޭއިރު، ސުޕްރީމް ކޯޓުގެ ފަނޑިޔާރުން ރަށުން ބޭރަށް ވަޑައިގަންނަވާނަމަ އުއްތަމަ ފަނޑިޔާރަށް އަންގަންޖެހެއެވެ. ހައި ކޯޓުގެ ފަނޑިޔާރުން ރަށުން ބޭރަށް ވަޑައިގަންނަވާނަމަ އެ ކޯޓުގެ އިސް ފަނޑިޔާރަށް އަންގަންޖެހޭނެއެވެ.
މީގެ އިތުރުން، ދަށު ކޯޓުތަކުގެ ފަނޑިޔާރުން ރަށުން ބޭރަށް ވަޑައިގަންނަވާނަމަ އެ ކޯޓެއްގެ އިސް ގާޒީއަށް އަންގަންޖެހޭއިރު، ޖުޑީޝަލް ދާއިރާތަކުގެ މެޖިސްޓްރޭޓުން ރަށުން ބޭރަށް ދާނަމަ އެ ޖުޑީޝަލް ދާއިރާއެއްގެ އިސް މެޖިސްޓްރޭޓަށް އަންގަންޖެހޭނެކަމަށް ސާކިއުލާގައި ބަޔާންކޮށްފައިވެއެވެ.
