ސިޔާސީ ޕާޓީތައް ޖޫރިމާނާ ކުރެވޭ ގޮތަށާއި، އަދި އުވާލުމަށް ނިންމާ ސިޔާސީ ޕާޓީތަކުގެ ކުލަޔާއި ނަމާއި ނިޝާން، އެ ޕާޓީއެއް އުވާލާތާ ފަސް އަހަރު ވަންދެން ބޭނުން ނުކެރޭނެކަމަށް ބަޔާން ކޮށްފައިވާ، ސިޔާސީ ޕާޓީތަކުގެ ގާނޫނަށް އިސްލާހު ގެނައުމަށް ރައްޔިތުންގެ މަޖިލީހުން ފާސްކުރި ބިލް ރައީސް ޑރ. މުހައްމަދު މުއިއްޒު ތަސްދީގު ކުރައްވައިފި އެވެ.
ރައީސް ޑރ. މުހައްމަދު މުއިއްޒު މިއަދު ތަސްދީގު ކުރެއްވި ސިޔާސީ ޕާޓީތަކުގެ ގާނޫނަށް ގެނެވުނު އިސްލާހުތަކުގެ ދަށުން، އުވާލެވޭ ޕާޓީތަކުގެ ކުލަ، ނަން އަދި ނިޝާން ފަސް އަހަރު ވަންދެން އެހެން ފަރާތްތަކަށް ބޭނުން ނުކުރެވޭނެއެވެ.
ނޮވެމްބަރު 13 ގައި މަޖިލީހުން މި ބިލު ފާސްކުރިއިރު، 61 މެންބަރުން ވޯޓު ދެއްވާފައިވަނީ ފެންނަ ކަމަށެވެ. ނުފެންނަ ކަމަށް ވޯޓު ދެއްވީ 10 މެންބަރުންނެވެ. ވެރިކަން ކުރާ ޕީއެންސީގެ ދިއްދޫ ދާއިރާގެ މެންބަރު އަބްދުލްލަތީފު މުހައްމަދު ހުށަހެޅުއްވި މި ބިލުގައި، ގާނޫނާ ހިލާފުވާ މެންބަރުންނާއި އެ މެންބަރުން ނިސްބަތްވާ ޕާޓީ 100،000 ރުފިޔާއިން ޖޫރިމަނާ ކުރެވޭނެ މާއްދާއެއް ހިމެނެއެވެ.
ފަރެސްމާތޮޑާ ދާއިރާގެ މެންބަރު އަޝްރަފް ރަޝީދުގެ ހުށަހެޅުއްވުމަށް 41 މެންބަރުން ތާއީދު ކުރެއްވުމާ ގުޅިގެން، އުވާލެވޭ ޕާޓީތަކުގެ ކުލަ، ނަން، ނިޝާން، ލޯގޯ އަދި އެހެނިހެން ރަމްޒުތައް ފަސް އަހަރު ވަންދެން ބޭނުން ނުކުރެވޭނެ ގޮތަށް ގާނޫނު އިސްލާހު ކުރެވުނެވެ. އަދި 39 މެންބަރުންގެ ތާއީދާއެކު، ކޮންމެ ފަސް އަހަރަކުން އެއްފަހަރު ގައުމީ ބައްދަލުވުން ނުބާއްވާ ޕާޓީތައް އުވާލެވޭ ގޮތަށް ކުރިން އޮތް މާއްދާވެސް އުވާލެވުނެވެ.
ރާއްޖޭގައި ދެވަނައަށް އެންމެ މެންބަރުން ގިނަ ސިޔާސީ ޕާޓީ، ޕީޕީއެމް އުވާލުމުގެ މަސައްކަތް ކުރަމުންދާ ދަނޑިވަޅެއްގައި މި އިސްލާހުތައް ގެނެވިފައިވާއިރު، ވެރިކަންކުރާ ކޯލިޝަނުގައި ހިމެނޭ މި ޕާޓީ އުވާލުމުގެ މަސައްކަތް ފަސޭހަކުރުމަށް އަސާސީ ގަވާއިދަށް ބަދަލުތަކެއް ގެނެސް، ޕާޓީގެ ލީޑަޝިޕްވެސް ބަދަލުކޮށްފައިވެއެވެ. ނަމަވެސް ޕާޓީ އުވާލުމާ ގުޅޭގޮތުން އެ ޕާޓީގެ އިސްވެރިން އަދި ރަސްމީކޮށް އެއްވެސް ވާހަކައެއް ދައްކަވާފައެއް ނުވެއެވެ.
