މިހާރު ފެންނަނީ އުންމީދެއް ނެތް، މާޔޫސްކަމެއްގެ ތެރެއަށް ރައްޔިތުން ވައްޓާލާ މަންޒަރު ކަމަށް ކުރީގެ ރައީސް އިބުރާހިމް މުހައްމަދު ސާލިހު ވިދާޅުވެއްޖެއެވެ.
އެމަނިކުފާނު މިހެން ވިދާޅުވީ މިއަދު ރާއްޖެ ޓީވީގެ "ފަށާއިރު" ޕްރޮގްރާމްގައި މި ސަރުކާރަށް ވަރަށް ބޮޑަށް ފާޑު ވިދާޅުވެ ވާހަކަ ދައްކަވަމުންނެވެ.
މި ޕްރޮގްރާމްގައި ވާހަކަ ދައްކަވަމުން ރައީސް ސާލިހު ވިދާޅުވީ ރައީސް ޑރ. މުހައްމަދު މުއިއްޒުގެ ސަރުކާރަކީ އަމާޒެއް ނެތް ސަރުކާރެއް ކަމަށާއި، ރައްޔިތުން ބިރުވެރިކަމުގެ ތެރެއަށް ވައްޓާލާފައިވާ ކަމަށެވެ. އަދި ރައީސް މުއިއްޒު ވެރިކަމާ ހަވާލުވެވަޑައިގަތުމާއެކު ބާރުތައް ޖަމާކުރައްވަން ފެށްޓެވި ކަމަށް ރައީސް ސާލިހު ފާހަގަކުރެއްވިއެވެ.
މީޑިއާ ދާއިރާއަށް އަމާޒުކޮށް ވާހަކަފުޅު ދައްކަވަމުން، މޯލްޑިވްސް މީޑިއާ ކައުންސިލާއި މޯލްޑިވްސް ބްރޯޑްކާސްޓިން ކޮމިޝަން އުވާލުމަށްފަހު، ރައީސުލްޖުމްހޫރިއްޔާގެ ފުރިހަމަ ކޮންޓްރޯލް އޮންނަ ކޮމިޝަނެއް އުފެއްދުމަށް މަޖިލީހަށް ހުށަހެޅިފައިވާ ބިލަކީ ޑިމޮކްރެސީއަށް އެޅޭނެ އެންމެ ނުރައްކާތެރި ފިޔަވަޅު ކަމުގައި ރައީސް ސާލިހު ވިދާޅުވިއެވެ.
ބިލުގައި މިއޮތީ އުފައްދަވާ ނޫސްވެރިކަމާ ބެހޭ ކޮމިޓީގެ ދަށުން މެޖޯރިޓީ ރައީސް އައްޔަންކުރައްވާ ބޭފުޅުން، ހަތް ބޭފުޅުންގެ ތެރެއިން ހަތަރު ބޭފުޅުން އެއީ ރައީސް އައްޔަންކުރައްވާ ބޭފުޅުންގެ ގޮތުގައި ތިބެގެން މުޅި މީޑިއާ ކޮންޓްރޯލްކުރުމުގެ މަސައްކަތް ފަށާފަ.
މި ސަރުކާރުން މަޖިލީހަށް މިހާރު ހުށަހަޅާފައިވާ މީޑިއާގެ ބިލަށް ފާޑު ވިދާޅުވަމުން ރައީސް ސާލިހު ވިދާޅިވިއެވެ.
މަސްވެރިންނަށް ވެފައިވާ ވައުދުތައް ނުފުއްދޭ ކަމަށް ފާހަގަކުރައްވައި، މަހުގެ އަގު 20 ރުފިޔާއަށްވުރެ ބޮޑު އަގެއްގައި ގަނެ، 48 ގަޑިއިރު ތެރޭގައި އޭގެ އަގު ޑޮލަރުން ދޭނެ ކަމަށް ބުނެފައިވާއިރު، 16 ރުފިޔާއަށް މަސް ގަނެ، ދެތިން ހަފުތާވަންދެން ފައިސާ ނުދެވި އޮންނަ ކަމަށް ވިދާޅުވިއެވެ.
ވީ ވައުދު އެ އޮތީ 20 ރުފިޔާ އަށް ވުރެ ބޮޑު އަދަދުގައި މަސް ގަންނާނަމޭ އަދި 48 ގަޑިއިރު ތެރޭގައި އޭގެ އަގު މަސްވެރިންނަށް ލިބޭނެ ކަމާއި، އަދި އެ ޑޮލަރުން މަސްވެރިންނަށް ލިބޭނެ ކަމަށް އޮތް ވައުދު ނުފުދި އެއަށްވުރެ 16 ރުފިޔާއަށް މަސްގަނެފަ އެ ލާރި ނުދެވި އެދަނީ ދެ ހަފްތާ ތިން ހަފްތާ ވެގެން ދާއިރު.
ރައީސް ސާލިހު ވިދާޅުވިއެވެ.
އަދި ޓޫރިޒަމް ސެކްޓަރާއި ޓެކްސީ ޑްރައިވަރުންގެ ހާލަތު ދަށްވެފައިވާ ކަމަށާއި، އެންމެ ނިކަމެތި މީހާވެސް މިހާރު ސިއްހީ ފަރުވާއަށް ސަލާންޖަހަން ޖެހިފައިވާ ކަމަށް ސޯލިހު ވިދާޅުވިއެވެ. ސަރުކާރުގެ ސިޔާސަތުތަކުން ފެންނަނީ ނާއުންމީދީ މަންޒަރު ކަމަށާއި، ރައީސް މުއިއްޒު ވެފައިވާ ވައުދުތަކާ ޚިލާފުވެ، ކެނޑިނޭޅި ދޮގުހަދައި އޮޅުވާލަމުންދާ ކަމަށްވެސް ވިދާޅުވިއެވެ.
ސޯލިހު އިތުރަށް ވިދާޅުވީ، މި ސަރުކާރު ފުރަތަމަ ދުވަހުން ފެށިގެން ސިފަވެގެން ދިޔައީ ވިރާސީ ރަސްކަމަކަށް މިސްރާބު ޖަހާފައިވާ މަންޒަރު ކަމަށާއި، ހުދުމުހުތާރު ސިފަތައް ފާޅުވަމުންދާ ކަމަށެވެ. މިހުރިހާ ކަމަކުން ދޭހަވަނީ ޑިމޮކްރެސީ ވެރިކަން ކަޝިޔާރުވެފައިވާ މަންޒަރު ކަމަށްވެސް ވިދާޅުވިއެވެ.
