ޓޫރިޒަމް މިނިސްޓްރީން ހާމަ ކޮށްފައިވާ ގޮތުގައި، މިއަހަރު ފަތުރުވެރިކަމުގެ ބޭނުމަށް ދޫކުރި 11 ރަށުން އެކުއިޒިޝަން ކޯސްޓުގެ ގޮތުގައި 32.6 މިލިއަން ޑޮލަރު ދައުލަތަށް މިހާތަނަށް ވަނީ ލިބިފައެވެ. މި ރަށްތަކުގެ އިންވެސްޓްމަންޓުގެ އަގު 400 މިލިއަން ޑޮލަރަށްވުރެ މަތިވާނެ ކަމަށް އެ މިނިސްޓްރީން ލަފާކުރެއެވެ. އަދި މިއަހަރު ޓޫރިޒަމް ބިމުގެ ކުލީގެ ގޮތުގައި 97.4 މިލިއަން އެމެރިކާ ޑޮލަރު ވަނީ ދައުލަތަށް ލިބިފައެވެ.
ޓޫރިޒަމް މިނިސްޓަރު އިބްރާހިމް ފައިސަލް މީގެކުރިން ހާމަކުރެއްވިގޮތުގައި، ރިސޯޓު ހެދުމުގެ ހުއްދަ ދީފައިވާ ނަމަވެސް މަސައްކަތް ނުފެށި 22 ރަށެއްގެ އެއްބަސްވުމާމެދު ގޮތެއް ނިންމުމަށް އެޓަރނީ ޖެނެރަލްގެ ލަފައަކަށް ވަނީ އެދިފައެވެ. މި ރަށްތަކުގެ ތެރެއިން އެންމެ ގިނަ ރަށް ހިމެނެނީ ހދ. އަތޮޅުގައި ކަމަށާއި، އޭގެތެރޭގައި 15 އަހަރާއި 20 އަހަރު އަދި 30 އަހަރުވެފައިވާ ރަށްތައްވެސް ހިމެނޭކަމަށް އެމަނިކުފާނު ވިދާޅުވިއެވެ.
ރާއްޖޭގެ ފަތުރުވެރިކަމަށް އިންވެސްޓްކުރުމުގެ ފުރުސަތުތައް އިތުރުކުރުމަށް، ރާއްޖެއާއި ރާއްޖެއިން ބޭރުގައި ގިނަ މަސައްކަތްތަކެއް ކުރެވިފައިވާ ކަމަށް ޓޫރިޒަމް މިނިސްޓްރީން ބުނެއެވެ. މިގޮތުން އިންޑިޔާގެ ނިއުދިއްލީ، މުމްބާއީ އަދި ބެންގަލޫރުގައި ބިޒްނަސް ފޯރަމްތަކެއް ބޭއްވިފައިވެއެވެ.
މިއަހަރު ރާއްޖެއަށް 2 މިލިއަން ފަތުރުވެރިން ގެނައުމަށް ސަރުކާރުން އަމާޒުހިފާފައިވާއިރު، މިހާރު ފަތުރުވެރިން އަންނަ މިންވަރަށް ބަލާއިރު، އަހަރު ނިމޭއިރު 2.1 މިލިއަން ނުވަތަ 2.2 މިލިއަން ފަތުރުވެރިން ރާއްޖެއަށް ޒިޔާރަތްކުރާނެ ކަމަށް ޓޫރިޒަމް މިނިސްޓަރު ލަފާކުރައްވައެވެ.
