ޕީއެންސީން މިއަދު އާންމުކުރި އެ ޕާޓީގެ އެތެރޭގެ އިންތިޚާބަށް ކުރިމަތިލި ކެންޑިޑޭޓުންގެ ލިސްޓުގައިވާ 91 ދާއިރާގެ ތެރެއިން 32 ދާއިރާގެ މަޤާމުތަކަށް ކެންޑިޑޭޓުން އެއްވެސް އިންތިޚާބަކާ ނުލައި ހޮވިއްޖެއެވެ.
މިގޮތުން، ކުރީގެ ޔޫތު މިނިސްޓްރީގެ ޑެޕިއުޓީ މިނިސްޓަރު މަލްޝާ ޝަރީފް ވަނީ ޕީއެންސީގެ ހުޅުމާލެ އުތުރު ދާއިރާގެ ނައިބު ރައީސްކަމަށް ހޮވިފައެވެ. އަދި ކުޅުދުއްފުށީގެ ދާއިރާތަކަށް ވާދަކުރި ހުރިހާ ކެންޑިޑޭޓުންވެސް ވަނީ އިންތިޚާބަކާ ނުލައި ހޮވިފައެވެ. ނަމަވެސް ހޯރަފުށި ދާއިރާގެ ނައިބު ރައީސްކަމަށް އެއްވެސް މެންބަރަކު ކުރިމަތިލާފައި ނުވާކަން ލިސްޓުން ފާހަގަކުރެވެއެވެ.
މިދިޔަ ސެޕްޓެމްބަރު މަހު އިޢުލާންކުރި މި އިންތިޚާބުގައި ޖުމްލަ 2،095 މެންބަރުން އެކި މަޤާމުތަކަށް އައްޔަންކުރެވޭނެ ކަމަށް ޕާޓީން ބުނެފައިވެއެވެ. އެންމެ ފުރަތަމަ މިދިޔަ މަހުގެ 19 ވަނަ ދުވަހަށް ކަނޑައެޅި މި އިންތިޚާބު، ދެފަހަރެއްގެ މަތިން ފަސްކުރުމަށްފަހު، މިހާރު ވަނީ އަންނަ ހޮނިހިރު ދުވަހަށް ހަމަޖައްސާފައެވެ.
މި އިންތިޚާބުގައި ވާދަކުރެވޭ މަޤާމުތަކުގެ ތެރޭގައި ދާއިރާގެ ރައީސާއި ނައިބު ރައީސްގެ އިތުރުން، ރަށްރަށާއި އެއް ރަށް ނުވަތަ އަވަށް ހިމެނޭ ދާއިރާތަކުގެ ޒުވާނުންގެ ރައީސް، އަންހެނުންގެ ރައީސް، ޒުވާން މެންބަރު އަދި އާންމު ފަސް މެންބަރުންގެ މަޤާމު ހިމެނެއެވެ. ގިނަ ދާއިރާތަކުގެ ރައީސުން އިންތިޚާބު ނުކުރަނީ، އެ މަޤާމުތަކުގައި ރައްޔިތުންގެ މަޖިލީހުގައި އެ ދާއިރާތައް ތަމްސީލުކުރައްވާ މެންބަރުން ތިއްބަވާތީއެވެ.
