ޕީއެންސީ ފިޔަވައި މިވަގުތު ރާއްޖޭގައި ސިޔާސީ މަސައްކަތްކުރާ އެހެން ޕާޓީއެއް ނެތް ކަމަށާއި، ރާއްޖޭގެ އެއްވެސް ރަށެއްގައި މިހާރު ޕީއެންސީއާއި ވާދަކުރެވޭނެ ޕާޓީއެއް ނޯންނާނެކަމަށް ރައްޔިތުންގެ މަޖިލީހުގެ ރައީސް އަދި ޕީއެންސީގެ ޗެއަރޕަރސަން ޢަބްދުއްރަޙީމް ޢަބްދުﷲ ވިދާޅުވެއްޖެއެވެ.
ޕީއެންސީގެ އޮފީހުގައި ރޭ ބޭއްވުނު ފޯމު ހަވާލުކުރުމުގެ ރަސްމިއްޔާތުގައި އަބްދުއްރަޙީމް ވިދާޅުވެފައިވަނީ، ރައީސް މުޢިއްޒުގެ އަމާޒާ އެއްގޮތަށް ޕާޓީގެ މެންބަރުންގެ އަދަދު 80،000 އަށްވުރެ މައްޗަށް އަރާފައިވާ ކަމަށެވެ.
ހަމަ ޔަގީންކަމާއެކު އަޅުގަނޑަށް ދަންނަވަން ކެރޭ މާލޭގައި ޕީއެންސީއަށްވުރެ މެންބަރުން ގިނަ އެހެން ޕާޓީއެއް ނޯއްނާނެ، ރާއްޖޭގެ އެއްވެސް ރަށެއްގައި ވެސް މިހާރު ހީއެއް ނުވޭ ޕީއެންސީއާއި ވާދަކުރެވޭނެ ޕާޓީއެއް އޮންނާހެނެއް، އަޅުގަނޑުމެންގެ އަމާޒަކީ އިރާދަކުރެއްވިއްޔާ ކުރިއަށް އޮތްތާގައި ވެސް އަޅުގަނޑުމެންނާ ހަމަޔަށް ދެން އިތުރު ޕާޓީއަކަށް މެމްބަރޝިޕްގެ ގޮތުން ވެސް ހަރަކާތުގެ ގޮތުންވެސް އަދި ރައްޔިތުންނާއި އޮންނަ ގުޅުމުގެ ތެރެއިން ވެސް އެހެން ބަޔަކަށް ނާދެވޭ ވަރަަށް މިޕާޓީގެ ހަރަކާތްތަށް ކުރިއަށް ގެންދިޔުން.
މަޖިލީހުގެ ފޮނަދޫ ދާއިރާގެ މެންބަރު އަދި މަޖިލީހުގެ ރައީސް ޢަބްދުއްރަޙީމް ޢަބްދުﷲ ވިދާޅުވިއެވެ.
ޕާޓީއަށް ލިބުނު މި ކާމިޔާބީއަކީ ވޭތުވެދިޔަ އެއް އަހަރުގެ ތެރޭގައި ރައީސް މުޢިއްޒު ކޮށްދެއްވި ޚިދުމަތްތައް ރައްޔިތުން އުފަލާއެކު ބަލައިގަތްކަމުގެ ހެއްކެއް ކަމަށް އަބުދުއްރަހީމް ފާހަގަކުރެއްވިއެވެ.
އަދި މާލެއާއި ރާއްޖޭގެ އެއްވެސް ރަށެއްގައި ޕީއެންސީއާ ވާދަކުރެވޭވަރުގެ ޕާޓީއެއް ނެތްކަމަށް ވިދާޅުވެ، މެންބަރޝިޕްގެ ގޮތުންނާއި، ހަރަކާތްތަކުގެ ގޮތުންނާއި، ރައްޔިތުންނާ އޮންނަ ގުޅުމުގެ ގޮތުން އެހެން ޕާޓީއަކަށް ޕީއެންސީއާ ހަމައަށް ނާދެވޭވަރަށް މަސައްކަތްކުރުމަކީ އެ ޕާޓީގެ އަމާޒު ކަމުގައި ވިދާޅުވިއެވެ.
