ފަތުރުވެރިކަމާބެހޭ ވުޒާރާގެ އެންމެ ފަހުގެ ތަފާސް ހިސާބުތަކުން ދައްކާގޮތުން، މިއަހަރުގެ މިހާތަނަށް ރާއްޖެއަށް 1،733،680 ފަތުރުވެރިން ޒިޔާރަތްކޮށްފިއެވެ. މިއީ މިދިޔަ އަހަރުގެ މި މުއްދަތާ އަޅާބަލާއިރު 9.5 އިންސައްތައިގެ ކުރިއެރުމެކެވެ.

އަދި މިއަހަރު ސަރުކާރުން އަމާޒުކޮށްފައިވާ 2 މިލިއަން ފަތުރުވެރިންގެ ލަނޑުދަނޑިއާ ކައިރިވަމުންދާކަން ފާހަގަކުރެވެއެވެ.

މިއަހަރުވެސް ރާއްޖެއަށް އެންމެ ގިނަ ފަތުރުވެރިން އައިސްފައިވަނީ ޗައިނާއިން ކަމަށްވާއިރު، އެގައުމުން 243،843 ފަތުރުވެރިން ޒިޔާރަތްކޮށްފައިވެއެވެ. ދެވަނައަށް އެންމެ ގިނައީ ރަޝިޔާއިން 193،726 ފަތުރުވެރިންނެވެ. އަދި އިނގިރޭސިވިލާތުން 150،179 ފަތުރުވެރިންނާއި ޖަރުމަނުވިލާތުން 133،384 ފަތުރުވެރިން ވަނީ ރާއްޖެއަށް އައިސްފައެވެ.

މިވަގުތު ރާއްޖޭގައި 171 ރިސޯޓާއި، 14 ހޮޓަލާއި، 895 ގެސްޓްހައުސްގެ އިތުރުން 154 ސަފާރީ އުޅަނދު ވަނީ އޮޕަރޭޝަނަށް ގެނެސްފައެވެ.