އިސްލާމީ ކަންތައްތަކާ ބެހޭ ވުޒާރާއާއި މާލެ ސިޓީ ކައުންސިލް ގުޅިގެން، ކީރިތި ޤުރުއާނާބެހޭ ޤައުމީ މަރުކަޒުގެ ކްލާސްތައް ހިންގުމަށް ވިލިމާލޭގައި އައު ސެންޓަރެއް ހުޅުވައިފިއެވެ. ވިލިމާލެ މަސްޖިދުލް ބިއްރިގައި ދެ ކުލާސްރޫމާއެކު ޤާއިމްކޮށްފައިވާ މި ސެންޓަރު ހުޅުއްވައިދެއްވީ އިސްލާމީ ކަންތައްތަކާ ބެހޭ ވަޒީރު ޑރ. މުޙައްމަދު ޝަހީމް އަލީ ސަޢީދެވެ. މި ސެންޓަރުގެ ޢަމަލީ މަސައްކަތްތައް ކުރިއަށް ގެންގޮސްފައިވަނީ މާލެ ސިޓީ ކައުންސިލުންނެވެ.
ހުޅުވުމުގެ ރަސްމިއްޔާތުގައި ވާހަކަފުޅު ދައްކަވަމުން ވަޒީރު ވިދާޅުވީ، މި ސެންޓަރު ހުޅުވިގެންދިޔުމަކީ ވިލިމާލޭގެ ރައްޔިތުންނަށް ލިބިގެންދިޔަ ފަސޭހައެއް ކަމަށާއި، ރައީސް ޑރ. މުޙައްމަދު މުޢިއްޒުގެ ތަސައްވަރުގައި ހިމެނޭ ކީރިތި ޤުރުއާނުގެ ޢިލްމު ފެތުރުމަށް ލިބިގެންދިޔަ އިތުރު ކުރިއެރުމެއް ކަމަށެވެ. އަދި ވަކި ފިކުރަކަށް ނުޖެހި ދީނީ ޤައުމީ ކަންކަން ކުރުމުގެ ނަމޫނާއެއްގެ ގޮތުގައި މި ސެންޓަރު ފާހަގަކުރެއްވިއެވެ.
ރަށްރަށުގައި ކީރިތި ޤުރުއާން ކިޔެވޭނެ އިންތިޒާމް އެންމެ ފުރިހަމައަށް ހަމަޖެއްސުމަކީ މިއަދުގެ ސަރުކާރުގެ ވައުދެކެވެ. އިސްލާމްދީނަށް ލޯބިކުރާ ދިވެހިވަންތަ ޤައުމިއްޔަތެއް ބިނާކުރުމަށް ރައީސް މުއިއްޒުގެ ސަރުކާރުން ޚާއްސަ އިސްކަމެއް ދެއެވެ. މީގެކުރިން މާލެއާއި ބައެއް ރަށްރަށުގައި ޤުރުއާން ކުލާސްތައް ހިންގި ނަމަވެސް، އެ ކުލާސްތައް ދެމެހެއްޓެނިވި ގޮތެއްގައި ހިލޭ ހިންގިފައެއް ނުވެއެވެ. ނަމަވެސް، ރައީސް މުއިއްޒުގެ ވައުދާ އެއްގޮތަށް، މިހާރު ވަނީ މިސްކިތްތަކުގައި ހިލޭ ސާބަހަށް ޤުރުއާން ކުލާސް ހިންގުމަށް "މިސްކިތު ޤާރީ ކިލާސް" ގެ ނަމުގައި ޕްރޮގްރާމެއް ރަސްމީކޮށް ފަށާފައެވެ.
