އިސްލާމިކް މިނިސްޓްރީން ދިވެހިރާއްޖޭގެ މިސްކިތްތަކުގެ މުދިމުން އަމަލުކުރަންޖެހޭ ސުލޫކީ މިންގަނޑު އެކުލަވައިލައި އާއްމުކޮށްފިއެވެ. އިއްޔެއިން ފެށިގެން އަމަލުކުރަން ފެށުނު މި މިންގަނޑުގައި، އިމާމަކު އަދާކުރަންޖެހޭ ރަސްމީ ޒިންމާ އެހެން މީހަކާ ހަވާލުކުރެވޭނެ ދެ ހާލަތެއް ބަޔާންކޮށްފައިވެއެވެ. އެއީ ރަސްމީ އިމާމަށްވުރެ އިލްމީގޮތުން ގާބިލު އެހެން މީހަކު ޖަމާއަތުގައި ހާޒިރުވެ ހުންނަ ހާލަތާއި، މިނިސްޓްރީގެ ހުއްދައާއެކު އެކަމަށް އެކަށީގެންވާ ހުނަރާއި ގާބިލުކަން ހުރި ކުއްޖަކު ނުވަތަ މީހަކު އިމާމުވެ ނަމާދުކުރަން އަހުލުވެރިކުރުމުގެ ހާލަތެވެ.
އާއްމު ރައްޔިތުންނަށް ކުރެވޭނެކަމަށް މުޖުތަމައުން ގަބޫލުކުރާ ކަންކަމުގެ ތެރެއިން މުދިމަކަށްވީތީ ނުކުރެވޭނެ ކަމުގައި ގަބޫލުކުރާ ކޮންމެ އަމަލަކުން ދުރުހެލިވާންޖެހޭނެކަމަށް މި މިންގަނޑުގައި ބަޔާންކޮށްފައިވެއެވެ. އަދި ދީނީ ގޮތުން ދެބަސްވުން އޮތް ކަންކަމުގައި އިސްލާމިކް މިނިސްޓްރީން ކަނޑައަޅާފައިވާ އާއްމު މިންގަނޑުތަކަށް އަމަލުކުރުމަށް އަންގާފައިވެއެވެ.
މީގެއިތުރުން، ކަންކަމުގެ ހަގީގަތް ރައްޔިތުންނަށް އޮޅިދާނެ ގޮތްގޮތަށާއި މުޖުތަމައުގައި ފިތުނަ ފަސާދަ އުފެދިދާނެ ގޮތްގޮތަށް އަދި އާއްމު މަސްލަހަތު ގެއްލޭ ގޮތްގޮތަށް ސޯޝަލް މީޑިޔާއާއި އެހެނިހެން ވަސީލަތްތައް ބޭނުންކޮށްގެން ވާހަކަދައްކައި ޕޯސްޓުތައް ފަތުރައި ނުހެދުމަށް އިރުޝާދު ދީފައިވެއެވެ. އަދި ނަފުރަތާއި ރުޅިވެރިކަމަށް ޖާގަ ލިބޭ ގޮތަށް މީސްމީޑިޔާގައި އަދި އާއްމު ތަންތަނުގައި ވާހަކަ ނުދެއްކުމަށާއި، ސާބިތު ނުހިފޭ ވާހަކަތައް ނުދެއްކުމަށާއި، ރާއްޖެއާއި ރާއްޖެއިން ބޭރުގައި ހަރުކަށި ފިކުރަށް ހިތްވަރުނުދިނުމަށާއި، އެފަދަ އަމަލެއްގައި ބައިވެރިވެސް ނުވުމަށް އަންގާފައިވެއެވެ.
