ދިވެހި ފުލުހުންގެ ޚިދުމަތުން އިއްޔެ ހަވީރު 4 އިން 6 އަށް މުޅި ރާއްޖެ ހިމެނޭގޮތަށް ވޯކް އެންޑް ޓޯކް ހަރަކާތެއް ކުރިއަށް ގެންގޮސްފިއެވެ. މި ހަރަކާތުގެ މައިގަނޑު މަޤްސަދަކީ އަމާން މުޖުތަމައެއް ޤާއިމުކުރުމަށާއި ރައްޔިތުންނާ ފުލުހުންގެ ގުޅުން ބަދަހިކުރުމެވެ. މީގެ އިތުރުން އާންމު ރައްޔިތުންގެ ކަންބޮޑުވުންތައް ދެނެގަތުމާއި، ފުލުހުންގެ ހާޒިރީ އިތުރުކުރުމާއި، އެކި ސަރަހައްދުތަކަށް ޒިޔާރަތްކޮށް ކުށްތަކުން ރައްކާތެރިވުމަށް ރައްޔިތުން ހޭލުންތެރިކުރުވުމަށް މަޢުލޫމާތު ދިނުމަކީވެސް މި ހަރަކާތުގެ މުހިންމު ބައިތަކެވެ.
ފުލުހުން ޤާއިމުވެފައިވާ ހުރިހާ ރަށެއްގައި އެއްވަގުތެއްގައި ކުރިއަށް ގެންދިޔަ މި ހަރަކާތުގައި ކޮމިޝަނަރ އޮފް ޕޮލިސް އަލީ ޝުޖާއު އާއި ޑެޕިއުޓީ ކޮމިޝަނަރ އޮފް ޕޮލިސް އިސްމާއީލް ނަވީން ބައިވެރިވެވަޑައިގެންނެވިއެވެ. އެކި ރޭންކުތަކުގެ ފުލުހުންނާއި، ރަށްރަށުގެ ޕޮލިސް ސްޓޭޝަންތަކާއި ޕޮލިސް ޕޯސްޓު އަދި ޕޮލިސް ޑެސްކުތަކުގައި މަސައްކަތްކުރާ ގިނަ އަދަދެއްގެ ފުލުހުންވެސް މި ހަރަކާތުގައި ބައިވެރިވިއެވެ.
މި ހަރަކާތުގެ ތެރެއިން ރައްޔިތުންނާ ބައްދަލުކޮށް، އެބައިމީހުންގެ ކަންބޮޑުވުންތައް އަޑުއަހައި، ފުލުހުންގެ ޚިދުމަތް އިތުރަށް ރަނގަޅުކުރުމަށް ކުރެވިދާނެ ކަންކަމާ ގުޅޭގޮތުން މަޝްވަރާކުރެވުނެވެ. މިފަދަ ހަރަކާތްތަކުން ރައްޔިތުންނާއި ފުލުހުންގެ މެދުގައި އޮންނަ ގުޅުން އިތުރަށް ބަދަހިވެ، ކުށްމަދުކުރުމަށް ކުރެވޭ މަސައްކަތްތައް އިތުރަށް ހަރުދަނާވެގެންދާނެއެވެ.
ދިވެހި ފުލުހުންގެ ޚިދުމަތުން އަބަދުވެސް މަސައްކަތް ކުރަމުންދަނީ ރާއްޖެ ކުށްމަދު، އަމާން، ރައްކާތެރި ތަނަކަށް ހެދުމަށެވެ. އަދި ޤާނޫނުތައް ތަންފީޒުކުރުމުގައި ރައްޔިތުންގެ އެހީތެރިކަމާއި އެއްބާރުލުން ހޯދުމަކީ ފުލުހުންގެ މައިގަނޑު އެއް ވާޖިބެވެ. މިގޮތުން ކުށުގެ ބިރުވެރިކަމުން މުޖުތަމަޢު ސަލާމަތްކޮށް، އުފާވެރި އަދި ހިތްހަމަޖެހޭ މުޖުތަމަޢެއް ބިނާކުރުމަށް ފުލުހުން ދަނީ ކެނޑިނޭޅި މަސައްކަތްކުރަމުންނެވެ.
