މިއަދު މިނިވަން މުއައްސަސާތަކާ ބެހޭ ކޮމިޓީން މޯލްޑިވްސް މީޑިއާ ކައުންސިލް (އެމްއެމްސީ) އާ ގުޅޭގޮތުން ބޭއްވި ބައްދަލުވުން ސިއްރުކޮށްފިއެވެ. މި ބައްދަލުވުން ބޭއްވުނީ ހެނދުނު 11:30 ގައެވެ.
ކޮލަމާފުށީ ދާއިރާގެ ޕީއެންސީގެ މެމްބަރު އިބްރާހިމް ދީދީ ހުށަހެޅުއްވި ހުށަހެޅުމަށް، ފުވައްމުލަކު ދެކުނު ދާއިރާގެ ޕީއެންސީގެ މެމްބަރު އިބްރާހިމް ހުސައިން ތާއީދުކުރެއްވުމާއެކު، މަސްލަހަތު ފުށުއަރާ މައްސަލަތަކެއް ކަމަށްވާތީ ބައްދަލުވުން ސިއްރުކުރުމަށް ނިންމިއެވެ.
ކޮމިޓީގެ މުގައްރިރު، މާފުށީ ދާއިރާގެ ޕީއެންސީގެ މެމްބަރު ހުސައިން ރިޒާ އާދަމް ވިދާޅުވެފައިވަނީ، އެމްއެމްސީގެ މެމްބަރުން ހާޒިރުކުރެވުނީ އެ ކޮމިޓީއަށް ހުށަހެޅިފައިވާ ބައެއް ސިޓީތަކާއި ޝަކުވާތަކާ ގުޅިގެން ކަމަށެވެ. ނަމަވެސް އެއީ ކޮން ސިޓީތަކެއްކަން އޭނާ ހާމަކުރައްވާފައެއް ނުވެއެވެ.
އެހެންނަމަވެސް، މިދިޔަ މަހު އޮތް އެމްއެމްސީގެ އެވޯޑު ހަފްލާގައި "އަދަދު" އޮންލައިންގެ "ސްކީލާން" ޑޮކިއުމެންޓްރީއަށް ތަހުގީގީ ދާއިރާގެ ނޫސްވެރިކަމުގެ އިނާމު ލިބުމާ ގުޅިގެން، ޕީއެސްއެމުން އެ ޑޮކިއުމެންޓްރީ ލައިވްކޮށް ދެއްކުމުގެ މައްސަލަ މަޖިލީހަށް ހުށަހަޅާފައިވެއެވެ. ޕީއެސްއެމުން ބުނެފައިވަނީ، އެ މީޑިއާގެ ކޮންޓެންޓް އުސޫލާ ޚިލާފު އެއްޗެއް ދުރާލާ އެންގުމަކާ ނުލައި ދެއްކުމަށް އެމްއެމްސީން ރާވައިގެން ކުރި ކަމެއްގެ ގޮތުގައި ތުހުމަތުކުރެވޭ ކަމަށެވެ.
މީގެއިތުރުން، ދޮގު ޚަބަރު ފަތުރާ ނޫސްތަކާމެދު ފިޔަވަޅު ނާޅާތީ ރައީސް އޮފީހުންވެސް ވަނީ މަޖިލީހަށް ސިޓީ ފޮނުވާފައެވެ. އެމްއެމްސީން ކުރިން ބުނެފައިވާ ގޮތުގައި މި އަހަރުގެ ތެރޭގައި އެންމެ ގިނަ ޝަކުވާ ހުށަހަޅާފައިވަނީ ރައީސް އޮފީހުންނެވެ.
