އަންނަ އަހަރު ދައުލަތުގެ ދަރަނި 150 ބިލިއަން ރުފިޔާއަށް އަރާނެ ކަމަށް އަންނަ އަހަރަށް ހުށަހަޅާ ދދައުލަތުގެ ބަޖެޓުގައި ގޮތުގައި ފިނޭންސް މިނިސްޓްރީން ލަފާކޮށްފިއެވެ. މި އަހަރު ނިމޭއިރު ޖުމުލަ ދަރަނި ހުންނާނީ 139 ބިލިއަން ރުފިޔާގައެވެ.
ކުރިއަށް އޮތް އަހަރުތަކުގައި ރާވާފައިވާ ޑެފިސިޓް ބަޖެޓުތައް ފައިނޭންސްކުރުމަށާއި ދަރަނި ރީފައިނޭންސްކުރުމަށް ބޭނުންވާ ފައިސާ އިތުރުވާނެތީ، ދައުލަތުގެ ޖުމުލަ ދަރަނި އިތުރުވަމުންދާނެއެވެ. އަންނަ އަހަރު ޖުމުލަ ދަރަނި 150 ބިލިއަން ރުފިޔާއަށް އަރާއިރު، ސީދާ ދަރަނީގެ އަދަދު 138 ބިލިއަން ރުފިޔާގައި ހުންނާނެ ކަމަށް ލަފާކުރެވެއެވެ. ދައުލަތުގެ ޖުމުލަ ދަރަނީގެ ތެރޭގައި ދައުލަތުން ގެރެންޓީ ދީފައިވާ ލޯނުތައްވެސް ހިމެނޭނެއެވެ. މިގޮތުން އަންނަ އަހަރު ޖީޑީޕީގެ ނިސްބަތުން ދައުލަތުގެ ދަރަނި 124 ޕަސެންޓުގައި ހުންނާނެއެވެ.
ފިނޭންސް މިނިސްޓްރީން ފާހަގަކުރާ ގޮތުގައި 2026 އަދި 2027 ވަނަ އަހަރުވެސް ދައުލަތުގެ ސީދާ ދަރަނި ޖީޑީޕީގެ ނިސްބަތުން 95 ޕަސެންޓަށްވުރެ ދަށަކަށް ނުދާނެއެވެ. މި މިންވަރަށް ދަރަނި ދަށްކުރުމަށްޓަކައި އިސްލާހީ ފިޔަވަޅުތަކާއި ޚަރަދު ކުޑަކުރުމަށް އިތުރު ފިޔަވަޅުތައް އަޅަންޖެހޭނެއެވެ.
ދަރަނި ކުޑަނުކުރެވިއްޖެނަމަ ބަޖެޓާއި އާމްދަނީގެ ނިސްބަތުން ޚަރަދު މެނޭޖުކުރުމަށް ދަތިވެ، ތަރައްޤީގެ މަޝްރޫޢުތައް ހިންގުމާއި އަސާސީ ޚިދުމަތްތައް ފޯރުކޮށްދިނުމަށް ގޮންޖެހުންތަކާ ކުރިމަތިވާނެ ކަމަށް ފިނޭންސް މިނިސްޓްރީން ވަނީ އިންޒާރުދީފައެވެ.
