މޯލްޑިވްސް މަނިޓަރީ އޮތޯރިޓީގެ ތަފާސްހިސާބުތަކުން ދައްކާގޮތުގައި ރާއްޖޭގެ ރަސްމީ ރިޒާވް އޮކްޓޫބަރު މަހު ވަނީ 614.6 މިލިއަން ޑޮލަރަށް އަރާފައެވެ. މިއީ ސެޕްޓެންބަރު މަހު ހުރި 371.2 މިލިއަން ޑޮލަރާ އަޅާބަލާއިރު ފާހަގަކޮށްލެވޭ އިތުރުވުމެކެވެ.
މި އިތުރުވުން އައިސްފައިވަނީ މައިގަނޑު ގޮތެއްގައި ރިޒާވް ބޭންކް އޮފް އިންޑިއާ (އާރްބީއައި) އިން ކަރަންސީ ސްވޮޕްގެ ގޮތުގައި ލިބުނު 400 މިލިއަން ޑޮލަރުގެ ސަބަބުންނެވެ. މި ފައިސާގެ ތެރެއިން 120 މިލިއަން ޑޮލަރު ވަނީ ރާއްޖޭގެ ބޭންކުތަކުގައި އިންވެސްޓް ކުރެވިފައެވެ. އެމްއެމްއޭއިން ފާހަގަކުރައްވާ ގޮތުގައި މި ނިންމުމުގެ ސަބަބުން އެމްއެމްއޭގެ ރިޓާން އޮޕްޓިމައިޒްވުމުގެ އިތުރުން މާލީ ދާއިރާގެ ހަމަޖެހުމާއި ކުރިއެރުމަށް މަގުފަހިވެ، މުޅި އިގުތިސާދަށް ފައިދާ ކުރާނެއެވެ.
ރަސްމީ ރިޒާވް މިހާ ބޮޑަށް އިތުރުވެފައިވީ ނަމަވެސް، ޔޫސަބަލް ރިޒާވްގެ ގޮތުގައި ދައްކަނީ 31.5 މިލިއަން ޑޮލަރެވެ. އެމްއެމްއޭގެ ނޫސްބަޔާނުގައި ފާހަގަކޮށްފައިވާ ގޮތުގައި ޔޫސަބަލް ރިޒާވްގެ ހިސާބުތައް ތައްޔާރުކުރެވެނީ ރާއްޖޭގެ ބޭންކުތަކުގައި އިންވެސްޓްކޮށްފައިވާ 120 މިލިއަން ޑޮލަރު ހިމަނައިގެންނެވެ. މި ދަނޑިވަޅުގައި ސަރުކާރުން ދަނީ ދައުލަތުގެ މާލީ ނިޒާމަށް ކުރިމަތިވެފައިވާ ގޮންޖެހުންތައް ހައްލުކޮށް ރިޒާވް ރަނގަޅު ކުރުމަށް މަސައްކަތްތަކެއް ކުރަމުންނެވެ.
