ދިވެހިރާއްޖޭގައި ޣައިރު ޤާނޫނީ ގޮތުގައި ދިރިއުޅެމުންދާ ބިދޭސީން ހޯދުމަށް ނޮވެމްބަރު 6 ގައި ހިންގި ރެއިޑެއްގައި މާލޭގައި ބިދޭސީން ދިރިއުޅޭ ދެ ތަނެއް ބަލާސް ފާސްކޮށްފައިވާކަމަށް މޯލްޑިވްސް އިމިގްރޭޝަނުން ބުނެފިއެވެ.
އަދި މި ތަންތަނުން، ޞައްޙަ ވިސާއެއް ނެތި ޣައިރު ޤާނޫނީ ގޮތުގައި ދިރިއުޅެމުންދިޔަ 13 ބިދޭސީން ވަނީ އިމިގްރޭޝަންގެ ބެލުމުގެ ދަށަށް ގެނެވިފައިވާކަމަށްވެސް އިމިގްރޭޝަނުން ބުނެފައި ވެއެވެ.
މޯލްޑިވްސް އިމިގްރޭޝަނުން ވަނީ މޯލްޑިވްސް ޕޮލިސް ސަރވިސް (އެމްޕީއެސް) އާއި އެހެނިހެން ކަމާބެހޭ އިދާރާތަކާ ގުޅިގެން ދިވެހިރާއްޖޭގައި ޣައިރު ޤާނޫނީ ގޮތުގައި ދިރިއުޅެމުންދާ އަދި ޣައިރު ޤާނޫނީ ވިޔަފާރީގައި ހަރަކާތްތެރިވާ ބިދޭސީން ހޯދައި އަޅަންޖެހޭ ފިޔަވަޅުތައް އަޅަމުންދާ ކަމުގައެވެ.
ކޮންޓްރޯލަރ ޖެނެރަލް އޮފް އިމިގްރޭޝަން މުޙައްމަދު ޝަމްޢާން ވަޙީދު ވިދާޅުވި ގޮތުގައި މި އޮޕަރޭޝަން އަތޮޅުތަކަށްވެސް ފުޅާކުރެވޭނެއެވެ. މާލެ ސަރަޙައްދުގައި ޣައިރު ޤާނޫނީ ބިދޭސީން ދިރިއުޅޭ ތަންތަން ބަލާ ފާސްކުރުމުގެ އޮޕަރޭޝަން ފެށުމަށްފަހު، ގިނަ ރަށްރަށުގައި ގަވާއިދާ ޚިލާފަށް އުޅެމުންދާ ބިދޭސީންގެ އަދަދު އިތުރުވަމުންދާކަމުގެ ޝަކުވާ އާންމުންގެ ފަރާތުން ލިބެމުންދާކަމަށްވެސް އިމިގްރޭޝަންއިން ބުނެފައި ވެއެވެ.
އިމިގްރޭޝަނުން ފާހަގަކޮށްފައިވާ ގޮތުގައި ދިވެހިރާއްޖޭގައި ގަވާއިދާ ޚިލާފަށް ދިރިއުޅެމުންދާ ބިދޭސީން ގަވާއިދުގެ ތެރެއަށް ގެނައުމަށް ގިނަގުނަ މަސައްކަތްތަކެއް ކުރެވެމުންދެއެވެ. އަދި މި ޚާއްޞަ އޮޕަރޭޝަނަކީ މި މައްސަލަ ޙައްލުކުރުމަށް އެޅިފައިވާ އެންމެ މުހިންމު ފިޔަވަޅުތަކުގެ ތެރެއިން އެއް ފިޔަވަޅުކަން އެ ޑިޕާޓްމަންޓުން ފާހަގަކޮށްފައިވެއެވެ.
މިހާތަނަށް 4,428 ޣައިރު ޤާނޫނީ ބިދޭސީން ވަނީ ދިވެހިރާއްޖެއިން ޑިޕޯޓްކުރެވިފައެވެ.
މާލޭގައި ބިދޭސީންގެ މައްސަލަ ޙައްލުކުރުމަށް ކުރިއަށްގެންދާ އޮޕަރޭޝަނުގެ އިތުރުން، މީހުން ދިރިއުޅޭ އެހެން ރަށްރަށާއި، ރިސޯޓުތަކާއި، ސިނާޢީ ރަށްރަށާއި، ދަނޑުވެރިކަމަށް ކުއްޔަށް ދޫކޮށްފައިވާ ރަށްރަށުގައި ދިރިއުޅޭ ބިދޭސީންގެ މަޢުލޫމާތު އެއްކުރުމުގެ މަސައްކަތްވެސް ކުރެވެމުންދެއެވެ.
