ކްރިމިނަލް ކޯޓަށް ދިމާވެފައިވާ ޖާގައިގެ ދަތިކަން ހައްލުކުރުމަށް، ހުޅުމާލޭގައި އަޅަމުންދާ އާ އިމާރާތުގެ މަސައްކަތް އަންނަ އަހަރުގެ މާޗު ނުވަތަ އޭޕްރީލް މަހާ ހަމައަށް ނިމޭނެކަމަށް ރައީސް ޑރ. މުހައްމަދު މުއިއްޒު ވިދާޅުވެއްޖެއެވެ.
އެމެނިކުފާނު މިހެން ވިދާޅުވީ ޖުމްހޫރީ ދުވަހާ ގުޅިގެން ރޭ ބޭއްވި ޚާއްސަ ޖަލްސާގައި ވާހަކަ ދައްކަވަމުންނެވެ. އިމާރާތް ނިމުމުން ކްރިމިނަލް ކޯޓުގެ މަސައްކަތްތައް ބާރަށް ކުރިއަށްދާނެ ކަމަށް ވެސް ރައީސް ފާހަގަކުރެއްވިއެވެ.
މީގެ އިތުރުން، އަންނަ އަހަރުގެ ބަޖެޓުގައި ހިމެނިފައިވާ ޝަރުއީ ދާއިރާގެ ސުޕީރިއާ ކޮމްޕްލެކްސް ހުޅުމާލޭގައި އެޅުމުގެ މަސައްކަތް ވެސް ފެށިގެންދާނެ ކަމަށާއި، ސުޕްރީމް ކޯޓަށް ބޭނުންވާ ބިން މިދިޔަ ހަފުތާގެ ތެރޭގައި މާލެއިން ހަމަޖެހިފައިވާ ކަމަށް ރައީސް ވިދާޅުވިއެވެ. އަދި އަންނަ އަހަރު ސިވިލް ސަރވިސް މުވައްޒަފުންނާއެކު، ޝަރުއީ ދާއިރާގެ މުވައްޒަފުންގެ މުސާރަ ވެސް ބޮޑުކުރެވޭނެ ކަމަށް އެމަނިކުފާނު ވަނީ ހާމަކުރައްވާފައެވެ.
ރައީސް އިތުރަށް ވިދާޅުވީ، ޝަރުއީ ދާއިރާ މިނިވަންކޮށް، އެހެން ފަރާތްތަކަށް ބަރޯސާނުވެ، އާދޭސްނުކޮށް މަސައްކަތްކުރެވޭނެ މާހައުލެއް ގާއިމުކުރުމަކީ އިޚްލާސްތެރި ވެރިކަމެއް ކުރާނެ ފަރާތްތަކުން ކަންކުރާނެ ގޮތް ކަމަށެވެ. އެގޮތުން، އެމަނިކުފާނު ވެރިކަމުގެ ހުވާކުރެއްވި ފަހުން، ސަރުކާރުގެ ފަރާތުން ޝަރުއީ ދާއިރާއަށް އެއްވެސް ނުފޫޒެއް ފޯރުވާފައި ނުވާނެ ކަމަށާއި، ކުރިއަށް އޮތްތަނުގައި ވެސް އެފަދަ ނުފޫޒެއް ނުފޯރުވާނެ ކަމުގެ ޔަގީންކަން ދެއްވިއެވެ.
ޝަރުއީ ދާއިރާއަށް ދިމާވެފައިވާ އެންމެ ބޮޑު އެއް ދަތިކަމަކީ ޖާގައިގެ ދަތިކަން ކަމަށްވާއިރު، މިއީ ޝަރީއަތްތައް ލަސްވެ ފުނިޖެހެމުންދާ މައިގަނޑު އެއް ސަބަބުކަމަށް ވެސް ފާހަގަކުރެވެއެވެ.
