ގާނޫނު އަސާސީގެ ރޫޙާ ޚިލާފަށް ބާރުތައް ޖަމާކުރުމަށް ރައްޔިތުން ޖާގަ ދީގެން ނުވާނެ ކަމުގައި އެމްޑީޕީގެ ރައީސް އަބުދުﷲ ޝާހިދު ވިދާޅުވެއްޖެއެވެ.
ޖުމްހޫރީ ދުވަހާ ގުޅިގެން ޝާހިދު ކުރެއްވި އެކްސް ޕޯސްޓެއްގައި ވިދާޅުވީ، މިހާރުގެ ސަރުކާރުން ޤާނޫނު އަސާސީގެ ރޫހާ ޚިލާފަށް ވެރިކަމުގެ ބާރުތައް ޖަމާކުރަމުންދާކަމަށާއި، އެ މަގަށް ރާއްޖެ ދިޔަ ނުދިނުމަކީ ކޮންމެ ރައްޔިތެއްގެވެސް ޤައުމީ ވާޖިބެއް ކަމުގައެވެ.
ޝާހިދު ވިދާޅުވީ ރިޔާސީ ނިޒާމު ނުވަތަ ސީދާ ރައްޔިތުން އިންތިޚާބުކުރާ ވެރިޔަކު ވެރިކަން ހިންގާ ނިޒާމެއް ދިވެހި ރައްޔިތުން ބަލައިގަތީ މަތިވެރި އުއްމީދެއްގައި ކަމަށާއި، އެއީ މާޒީގައި ދިވެހީން ކުރި ތަޖުރިބާގެ އަލީގައި، ހައްދެއްނެތި ބާރުތައްލިބިފައިވާ ޚުދްމުޚްތާރު ވެރިކަމުގެ ނިޒާމަށް ނޫނެކޭ ބުނުމަށް ކަމަށެވެ.
މިއަދު ޢަމަލުކުރަމުން މިދާ ޤާނޫނުއަސާސީގެ ފުރަތަމަ ބާބުގެ 4 ވަނަ މާއްދާގައި ވެރިކަމުގެ ބާރުތައް ވުޖޫދުވެގެން އަންނަ ގޮތް އެހާމެ ސާފުކޮށް ބަޔާން ކޮށްފައި އެވަނީ މިދެންނެވި ތަޖުރިބާގެ އަލީގަ. "ދިވެހިދައުލަތުގެ އެންމެހައި ބާރުތައް ފެށިގެން އަންނަނީ ރައްޔިތުންގެ ކިބައިންނެވެ. އަދި މިބާރުތައް ދެމިއޮންނާނީ ރައްޔިތުންގެ ކިބައިގައެވެ." ސާފު ސާދާ ޢިބާރާތުން ބުނެފައި އެވަނީ ދިވެހި ރައްޔިތުން ޚުދުމުޚްތާރު ވެރިކަމަކަށް ޖާގަ ނުދޭނެ ކަން.
ޝާހިދުގެ އެކްސް ޕޯސްޓުގައި ވިދާޅުވެފައި ވެއެވެ.
ޝާހިދު ވިދާޅުވީ ނަމަވެސް، ހިތާމައަކީ މިއަދު ޤާނޫނު އަސާސީގެ ރޫހާއި އަސާސްތަކާ ޚިލާފަށް ވެރިކަމުގެ ބާރުތައް އެއްފަރާތަކަށް ޖަމާކޮށް، ޚުދުމުޚްތާރު ވެރިކަމެއްގެ ސިފަ އަށަގަންނަމުންދާކަން ފެންނަމުންދާ ކަމަށް ކަމުގައެވެ. އަދޮ މިކަން ހުއްޓުވުމަކީ ހުރިހާ ދިވެހި ރައްޔިތުންގެ ވެސް ޤައުމީ ވާޖިބެއްކަމަށް ޝާހިދު ވިދާޅުވިއެވެ.
