ރައްޔިތުންނަށް ލިބިފައިވާ ބާރުތައް ދަމަހައްޓަން އާ ހިތްވަރަކާއެކު މަސައްކަތް ކުރަންޖެހިފައިވާ ކަމަށް ކުރީގެ ރައީސް އިބްރާހީމް މުހައްމަދު ސޯލިހް ވަނީ ވިދާޅުވެއްޖެއެވެ. އެމަނިކުފާނު މިހެން ވިދާޅުވީ ޖުމުހޫރީ ދުވަހުގެ މުނާސަބަތުގައި ކުރެއްވި އެކްސް ޕޯސްޓެއްގައެވެ.
ރައީސް ސާލިހު ވިދާޅުވި ގޮތުގައި ގައުމުގެ އެންމެހާ ކަންކަމުގައި ރައްޔިތުންނަށް ލިބިދީފައިވާ ބާރުތައް ދެމެހެއްޓުމަކީ ޖުމްހޫރިއްޔަތެއްގެ އެންމެ މުހިއްމު އަސާސް ކަމަށްވާއިރު، މިހާރު މިވަނީ މި މަސައްކަތް އާ ހިތްވަރަކާއެކު ކުރަންޖެހިފައެވެ.
އިދިކޮޅު އެމްޑީޕީން ދަނީ ސަރުކާރުން ރައްޔިތުންގެ ހައްގުތައް ނިގުޅައިގަނެ ޑިމޮކްރެޓިކް ނިޒާމު ފުނޑާލަމުންދާ ކަމަށް ބުނަމުންނެވެ.
މީގެ އިތުރުން، މިދިޔަ އޮކްޓޫބަރު މަހު އެމްޑީޕީން ކުޅުދުއްފުށީގައި ބޭއްވި "ލާމަރުކަޒީ ގުޅުން" ކޮންފަރެންސްގައި ރައީސް ސޯލިހް ވަނީ، ލާމަރުކަޒީ ނިޒާމު އެއްކޮށް ފުނޑާލުމަށްފަހު މި ސަރުކާރުގެ މިސްރާބު ޖެހިފައިވަނީ ހުދުމުހުތާރު ވެރިކަމަކާ ދިމާލަށް ކަމަށް ވިދާޅުވެފައެވެ.
