މި ސަރުކާރުން ސިޔާސީ ވާދަވެރިން ހައްޔަރުކުރުމުގެ ސިޔާސަތެއް ނުގެންގުޅުއްވާނެ ކަމުގައި ރައީސް ޑރ.މުޙައްމަދު މުޢިއްޒު މިރޭ ވިދާޅުވެއްޖެއެވެ. ރައީސް މުއިއްޒު މިހެން ވިދާޅުވީ ޖުމްހޫރީދުވަހުގެ ރަސްމީ ޖަލްސާގައި ވާހަކަފުޅު ދައްކަވަމުންނެވެ.
ރައީސް މުއިއްޒު ވިދާޅުވީ މިއީ އެމަނިކުފާނުގެ ސަރުކާރު ވެރިކަމަށް އައުމުގެ ކުރިންވެސް ދެއްކެވި ވާހަކައެއްކަމަށާއި، އަދިވެސް އެގޮތަށް އެސިޔާސަތު ދެމެހެއްޓޭނެކަމުގެ ޔަގީންކަން އޮތް ކަމުގައެވެ.
ކުރީގެ ސަރުކާރުތަކުގައި ފެނިގެންދިޔަ، ސިޔާސީ ވާދަވެރިން ޖަލަށްލުމުގެ ވިސްނުން މިހާރު ނިމުމަކަށް ގެނެސްފައިވާކަމަށް ރައީސް ވިދާޅުވިއެވެ. ނަމަވެސް ދައުލަތުގެ މުދަލާމެދު ޚިޔާނާތްތެރިވުން ފަދ ކަންކަމުގައި ޤާނޫނީ އިމުގެ ތެރެއިން ފިޔަވަޅު އެޅޭނެކަން ފާހަގަކުރެއްވިއެވެ.
ރައީސް މުޢިއްޒު ވިދާޅުވީ ވެރިކަމަކީ މުދަލެއް ނޫންކަމަށާއި، އެއީ ބޮޑު އަމާނާތެއްކަމަށެވެ. އެމަނިކުފާނުގެ ވެރިކަމުގައި މަސައްކަތް ކުރައްވަމުން ގެންދަވަނީ ރައްޔިތުންގެ ލާބައަށްކަމަށާއި، ކުރީގެ ސަރުކާރުތަކުން އަޅާނުލާ ދޫކޮށްލާފައި ހުރި ކަންކަން ރަނގަޅުކުރުމަށް ކަމަށްވެސް ވިދާޅުވިއެވެ.
އެހެންނަމަވެސް، ރައީސް ޔާމީނު ވަނީ ފަހުން މީޑިއާއަކަށް ދެއްވި ބަސްދީގަތުމެއްގައި ރައީސް މުޢިއްޒުގެ ބައެއް ސިޔާސަތުތަކާމެދު ހިތްހަމަނުޖެހުން ފާޅުކުރައްވާފައެވެ. ޚާއްޞަކޮށް ޗާގޯސް މައްސަލައާއި އިންޑިއާ ސިފައިން ރާއްޖެއިން ބޭރުކުރުމުގެ މައްސަލައިގައި ތެދުވެރިކަމާއެކު މަސައްކަތް ކުރައްވާފައި ނުވާކަމަށް ތުހުމަތުކުރައްވައި، އެމަނިކުފާނު ވެރިކަމަށް ގެނައުމަށް މަސައްކަތްކުރެވުނުކަން ހިތާމައާއެކު ފާހަގަކުރައްވާފައިވެއެވެ. ނަމަވެސް ރައީސް ޔާމީނު ސާފުކޮށް ވިދާޅުވެފައިވަނީ މިއީ ޑރ.މުޢިއްޒުގެ ޒާތީ މައްސަލައެއް ނޫންކަމަށާއި، ހަމައެކަނި ސިޔާސަތުތަކާ ގުޅޭ ކަންބޮޑުވުންތަކެއްކަމަށެވެ.
