އިނގިރޭސި ވިލާތުން ޗާގޯސްގެ ރަށްތައް މޮރިޝަސްއަށް ދިނުމަށް އެއްބަސްވުމާ ގުޅިގެން ރައީސް ޑރ. މުޙައްމަދު މުޢިއްޒު އިނގިރޭސި ސަރުކާރަށް ޚާއްޞަ ސިޓީފުޅެއް ފޮނުއްވައިފިއެވެ. މިއީ މިދިޔަ މަހު އިނގިރޭސި ވިލާތުގެ ފޮރިން މިނިސްޓަރު ޑޭވިޑް ލެމީ އިޢުލާންކުރެއްވި ނިންމުމަކާ ގުޅިގެންނެވެ.
މި ނިންމުމުގެ ދަށުން، ކުރީގައި އެތަނުގައި ދިރިއުޅުނު މީހުންނަށް އަނބުރާ ވަޒަންވެރިވުމުގެ ފުރުޞަތު ލިބިދެވޭ ގޮތަށް، ފޯޅަވަހީގެ އެންމެހައި ސިޔާދަތީ ބާރުތައް މޮރިޝަސްއަށް ދޫކޮށްލެވޭނެއެވެ. ނަމަވެސް އެއްބަސްވުމުގެ ދަށުން، ޑިއޭގޯ ގާސިއާގައި ހުރި އިނގިރޭސި-އެމެރިކާ އަސްކަރީ މަރުކަޒު ދެމިއޮންނާނެއެވެ.
ޖުމްހޫރީ ދުވަހުގެ ރަސްމީ ޖަލްސާގައި ވާހަކަފުޅު ދައްކަވަމުން ރައީސް މުޢިއްޒު ވިދާޅުވީ، ރާއްޖޭގެ ކަނޑުގެ ސަރަހައްދުން ބައެއް ގެއްލުނީ ބަޔަކު ގަސްދުގައި ކުރި ކަމަކުން ކަމަށާއި، އެ ސަރަހައްދު އަނބުރާ ހޯދުމަށް މި ސަރުކާރުން ކެނޑިނޭޅި މަސައްކަތްކުރަމުންދާ ކަމަށެވެ. އެގޮތުން، އ.ދ.ގައި ހުންނަ އެޓަރނީ ޖެނެރަލްގެ އޮފީހުގެ މުވައްޒަފަކު މެދުވެރިކޮށް މި މަސައްކަތް ކުރިއަށްދާ ކަމަށާއި، އިނގިރޭސި ސަރުކާރަށް ފޮނުވި ސިޓީގައި ދިވެހިރާއްޖެއާއި ޗާގޯސްއާ ހުރި ތާރީޚީ ގުޅުން ފާހަގަކޮށްފައިވާނެ ކަމަށް ވިދާޅުވިއެވެ.
މި މައްސަލައަކީ 2019 ގައި އިންޓަނޭޝަނަލް ކޯޓް އޮފް ޖަސްޓިސްއިން މޮރިޝަސްގެ ފަރާތަށް ނިންމި މައްސަލައަކާ ގުޅިގެން، ރާއްޖެއާއި މޮރިޝަސްގެ ކަނޑުގެ ސަރަހައްދު ފުށުއަރައިގެން ދިމާވި ކަމެކެވެ. މިދިޔަ ސަރުކާރުން މި މައްސަލަ ޙައްލުކުރީ ފުށުއަރާ ސަރަހައްދު ދެ ޤައުމުގެ މެދުގައި ހަމަހަމައަށް ބަހާލައިގެންނެވެ. އެހެންނަމަވެސް ރައީސް މުޢިއްޒުގެ ސަރުކާރުން މިހާރު މަސައްކަތް ކުރަމުންދަނީ ގެއްލިފައިވާ ސަރަހައްދު އަނބުރާ ހޯދުމަށެވެ.
