ރައީސުލްޖުމްހޫރިއްޔާ ޑރ. މުޙައްމަދު މުޢިއްޒުގެ އުއްމީދީ "ރަސްމާލެ" މަޝްރޫޢުގެ ބިން ހިއްކުމުގެ މަސައްކަތް އަލުން ފަށައިފިއެވެ. ހައުސިންގ ޑިވެލޮޕްމަންޓް ކޯޕަރޭޝަން (އެޗްޑީސީ) އިން ބުނާ ގޮތުގައި މިހާރު ކުރިއަށްދަނީ "އޭރިއާ އެފް" ގެ ބިން ހިއްކުމުގެ މަސައްކަތެވެ. މީގެ ކުރިން "އޭރިއާ ޖޭ" ގައި ހިމެނޭ 29 ހެކްޓަރުގެ ބިން ހިއްކުމުގެ މަސައްކަތް ވަނީ ނިމިފައެވެ.
ސަރުކާރުން ކުރިން ހާމަކުރެއްވި ގޮތުގައި ބިން ހިއްކުމުގެ މަސައްކަތް ހުއްޓިފައި އޮތް ނަމަވެސް، މަޝްރޫޢުގެ އެހެނިހެން މަސައްކަތްތައް ކުރިއަށްދިޔައެވެ. ބިން ހިއްކުމުގެ މަސައްކަތް މަޑުޖެހުނީ ވެލި ލިބުމުގައި ދިމާވި ދަތިތަކާ ހެދިއެވެ. ނަމަވެސް މިދިޔަ ސެޕްޓެމްބަރު މަހުގެ ފަހުކޮޅު، އީޕީއޭއިން މި މަޝްރޫޢަށް ވެލި ނެގުމުގެ ހުއްދަ ދެ ސަރަހައްދަކުން ދީފިއެވެ.
ވެލި ނެގުމުގެ ހުއްދަ ދީފައިވަނީ މާފުށްޓާ ކައިރިން ހުޅަނގަށް އޮތް ދެ ސަރަހައްދަށާއި އިތާފުށި ރިސޯޓު ކައިރިން ސަރަހައްދަކަށެވެ. މި ހުއްދަ ދީފައިވަނީ 6 މަސް ދުވަހުގެ މުއްދަތަށެވެ. އީޕީއޭއިން ބުނާގޮތުގައި 562 ހެކްޓަރުގެ ބިން ހިއްކުމަށް ބޭނުންވާ ވެލި ނެގުމުގެ ހުއްދައެވެ.
12 ސަރަހައްދަކަށް ބަހާލައިގެން ކުރިއަށްގެންދާ މި މަޝްރޫޢުގެ ބިން ހިއްކުމުގެ މަސައްކަތް ކުރަމުންދަނީ ދެ ކުންފުންޏަކާ ހަވާލުކޮށްގެންނެވެ. އަދި އިތުރު ކުންފުންޏަކާއެކު އެއްބަސްވުމެއް އެކުލަވާލުމުގެ މަސައްކަތް ދަނީ ކުރެވެމުންނެވެ.
ރަސްމާލެ މަޝްރޫޢުގެ ޢަމަލީ މަސައްކަތް ފެށީ މިދިޔަ އަހަރުގެ ޑިސެމްބަރު 18 ވަނަ ދުވަހުއެވެ. އޭރު މަސައްކަތް ރޭވިފައިވަނީ 10 މަހުގެ ތެރޭގައި ބިން ހިއްކުން ނިންމުމަށެވެ. ނަމަވެސް އެކި މައްސަލަތަކާ ގުޅިގެން ޕްރޮޖެކްޓަށް ބަދަލުތަކެއް ގެންނަމުންދާކަން ސަރުކާރުން ވަނީ ހާމަކުރައްވާފައެވެ.
މި މަޝްރޫޢުގެ ދަށުން ޖުމްލަ 1153 ހެކްޓަރުގެ ބިން ހިއްކުމަށް ވަނީ ހަމަޖެހިފައެވެ. ރަސްމާލެއަކީ 65,000 ގެދޮރު ޔަގީންކޮށްދޭ ޒަމާނީ ސިޓީއެއް ކަމަށާއި، މި ސިޓީ ތަރައްޤީކުރެވެނީ ތިމާވެށްޓާ ރައްޓެހި "އިކޯ ސިޓީ" އެއްގެ ގޮތުގައި ކަމަށް ރައީސުލްޖުމްހޫރިއްޔާ ޑރ. މުޙައްމަދު މުޢިއްޒު ވަނީ ވިދާޅުވެފައެވެ.
