ރައީސް ޑރ. މުހައްމަދު މުއިއްޒު ވެރިކަމަށް ވަޑައިގަތުމަށް ތައްޔާރު ކުރެއްވި މެނިފެސްޓޯގައި އެތައް ވާހަކައެއް ލިޔުނު ކަމުގައި ވިޔަސް، ކަންކަން ކުރައްވަނީ ދިމާ އިދިކޮޅަށް ކަމަށް އެމްޑީޕީގެ ޗެއާޕާސަން އަދި ކުރީގެ އިކޮނޮމިކް މިނިސްޓަރު ފައްޔާޒް އިސްމާއިލް ރޭ ވިދާޅުވެއްޖެއެވެ.
ފައްޔާޒް "އެކްސް" ގައި ކުރެއްވި ޕޯސްޓެއްގައި ވިދާޅުވީ އެތައް ޖަލްސާއެއްގައި ވިދާޅުވެ މެނިފެސްޓޯގައި ވަރަށް ސާފުކޮށް ބަޔާންކުރިޔަސް ވެރިކަމަށް ވަޑައިގެން ވަރަށް ގިނަ ކަންކަން ކުރައްވަމުން ގެންދަވަނީ ސީދާ ވިދާޅުވި ގޮތާ އިދިކޮޅަށް، ލިޔެފައިވާ ގޮތާ ހިލާފަށް ކަމަށެވެ.
ސަރުކާރުން ހަތް ރަށެއް އާބަން ސެންޓަރުގެ ގޮތުގައި ތަރައްގީ ކުރަން އިއުލާނު ކުރީ އެއްވެސް މަޝްވަރާ ކުރުމެއް ނެތި، ރައްޔިތުންގެ ހިޔާލު ހޯދުމެއް ނެތި ކަމަށް އޭނާ ވިދާޅުވިއެވެ.
"ގައުމީ ތަރައްގީގެ 20 އަހަރުގެ މާސްޓާޕްލޭން ވެސް އެކުލަވާލާނީ އެހެންކަމާއި އެ ޕްލޭނާ އެއްގޮތަށް ކަންކަން ވެސް ނުކުރައްވާނެކަން ދިވެހި ރައްޔިތުންނަށް މިއަދު ޔަގީންވޭ. ހުއްޓުމެއް ނެތި ހައްދަވަނީ ހުސް ދޮގު." ކުރިން އިކޮނޮމިކް މިނިސްޓަރުކަން ވެސް ކުރެއްވި ފައްޔާޒް ވިދާޅުވިއެވެ.
އަތޮޅު ތެރޭގައި ހަތް އާބަން ސެންޓަރެއް ބިނާކުރުމަކީ ސަރުކާރުގެ މެނިފެސްޓޯގައި ހިމެނޭ މުހިންމު ވައުދެކެވެ. އެއީ، މާލޭގެ އުތުރުން ތިން އާބަން ސެންޓަރާއި މާލޭގެ ދެކުނުން ހަތަރު އާބަން ސެންޓަރެވެ.
ރާއްޖޭގެ ހަތް ސަރަހައްދެއް އާބަން ސެންޓަރުގެ ގޮތުގައި ތަރައްގީކުރަން ސަރުކާރުން ނިންމިއިރު، އޭގެ ތެރެއިން ބޮޑުތިލަދުންމައްޗާއި، ރާއްޖޭގެ ދެކުނުގެ ސަރަހައްދު އުނިވެފައިވާތީ، އެމްޑީޕީގެ ރައީސް އަބްދުﷲ ޝާހިދު ވެސް ނުރުހުން ފާޅު ކުރައްވާފައިވެއެވެ. އެ ކަން ރައްޔިތުންނަށް ސާފުކޮށްދޭން ޖެހޭ ކަމަށް އޭނާވަނީ ވިދާޅުވެފައެވެ.
މިފަދަ ކަންކަން ނިންމުމުގައި ރަށު ކައުންސިލްތަކާއި އަތޮޅު ކައުންސިލްތަކުގެ މަޝްވަރާ ހޯދުމަކީ މުހިންމު ކަމެއް ކަމެއް ކަމަށް އޭނާ ވިދާޅުވިއެވެ.
ރައީސް އެކްސްގައި ކުރެއްވި ޕޯސްޓެއްގައި ވަނީ، އާބަން ސެންޓަރު ގާއިމްކުރާނެ ގޮތް އެމަނިކުފާނުގެ މެނިފެސްޓޯގެ ޗެޕްޓަރު ހަތަރެއްގެ 12، 13 އަދި 14 ގައި ވަރަށް ސާފުކޮށް ބަޔާންކޮށްފައި ވާނެ ކަމަށެވެ. އަދި މެނިފެސްޓޯ އިފުތިތާހުކުރި ޖަލްސާއިން ފެށިގެން މިއަދާ ހަމަޔަށް އެތައް ޖަލްސާއެއްގައި އެވާހަކަ ބަޔާންކޮށްފައި ވާނެކަމަށް އެމަނިކުފާނު ވިދާޅުވިއެވެ.
އެމަނިކުފާނު ވިދާޅުވީ، އެމަނިކުފާނުގެ ސިޔާސަތަކީ މާލޭގެ އާބަން ރީޖަން ގެ އިތުރުން ރާއްޖޭގެ އެންމެ އުތުރުން ތިން އަތޮޅު ހިމެނޭހެން ނޯދަން އިންޓަގްރޭޓަޑް ޑިވެލޮޕްމަންޓް ޒޯނަކާއި އެންމެ ދެކުނުގެ ހަތަރު އަތޮޅު ހިމެނޭހެން ސާދަން އިންޓަގްރޭޓަޑް ޑިވެލޮޕްމަންޓް ޒޯނެއް ތަރައްގީ ކުރުން ކަމަށެވެ.
އޭގެ އިތުރަށް ހަތް އާބަން ސެންޓަރު ރަށްރަށުގައި ތަރައްގީކުރައްވާނެ ކަމަށް ވެސް އެމަނިކުފާނުގެ ޕޯސްޓުގައިވެއެވެ. އެއީ މާލޭގެ އުތުރުން ތިން އާބަން ސެންޓަރާއި މާލޭގެ ދެކުނުން ހަތަރު އާބަން ސެންޓަރެވެ.
"މިކަންކަމަކީ ކުރިޔަށް އޮތް 20 އަހަރު ދުވަހަށް އެކަށައަޅަން މަސައްކަތް ފަށާފައިވާ ތަރައްގީގެ މާސްޓަޕްލޭންގައި ރާއްޖޭގެ ހުރިހާ ރަށެއްގެ ރައްޔިތުންގެ ޚިޔާލާއި، ފަންނީ ފަރާތްތަކާއި ކައުންސިލްތަކާއި ކަމާބެހޭ ހުރިހާ ފަރާތްތަކެއްގެ ބައިވެރިވުމާއެކު އެކަށައެޅުމަށް ގަސްދުކުރާ ކަންކަން،" ރައީސް ވިދާޅުވިއެވެ.
