ޖުމްހޫރީ ދުވަހުގެ މުނާސަބަތުގައި ބާއްވާ ރަސްމީ ޖަލްސާގައި 40 ފަރާތަކަށް ރައީސުލްޖުމްހޫރިއްޔާގެ ޚާއްޞަ އިނާމު އަދި 53 ފަރާތަކަށް ދައުލަތަށް ޚިދުމަތް ކުރުމުގެ އިނާމު ދެއްވުމަށް ހަމަޖެހިފައިވާކަމަށް ރައީސް އޮފީހުން ވިދާޅުވެއްޖެއެވެ. މިރޭ 8:15 ގައި ދަރުބާރުގޭގައި ބޭއްވޭ މި ޖަލްސާގައި ދެއްވާ އިނާމުތައް ލިބޭ ފަރާތްތައް ހޮވާފައިވަނީ ޤައުމީ އިނާމާބެހޭ ކޮމިޓީންނެވެ.
މީގެ އިތުރުން މި ޖަލްސާގައި އިސްލާމީ ޔުނިވަރސިޓީގެ ޗާންސެލަރ ޑރ. މުޙައްމަދު ޒާހިރު ޙުސައިނަށް އިއްޒުއްދީނުގެ އިއްޒަތުގެ ވެރިޔާގެ ޝަރަފު އެރުވުން އޮންނާނެއެވެ. މި ޝަރަފު އެރުވުމަށް ހަމަޖެހިފައިވަނީ ރާއްޖޭގެ ތަޢުލީމީ ދާއިރާގެ ތަރައްޤީއާއި ތަޢުލީމު ފުޅާކުރުމަށް އެމަނިކުފާނު ކޮށްދެއްވާފައިވާ ގިނަގުނަ ޚިދުމަތްތަކަށް ޓަކައެވެ.
ރާއްޖޭގައި ޖުމްހޫރީ ދުވަސް ފާހަގަކުރަމުން މިދަނީ 1968 ވަނަ އަހަރާ ހަމައަށް ދެމިއޮތް އައްސުލްޠާން މުޙައްމަދު ފަރީދުގެ ރަސްކަން ނިމުމަކަށް ގެނެސް، ރާއްޖޭގެ ދެވަނަ ޖުމްހޫރިއްޔާ ޤާއިމްކުރެވި، 1968 ވަނަ އަހަރުގެ ނޮވެމްބަރު 11 ވަނަ ދުވަހު އިބްރާހީމް ނާޞިރު ރައީސުލްޖުމްހޫރިއްޔާގެ މަޤާމަށް އިންތިޚާބުވުމާ ގުޅުވައިގެންނެވެ.
