ލޯކަލް ކައުންސިލްތަކުގެ މަޝްވަރާއެއް ނެތި އާބަން ސެންޓަރުތައް ކަނޑައެޅުމާމެދު އެމްޑީޕީގެ ރައީސް އަބްދުﷲ ޝާހިދު ކަންބޮޑުވުން ފާޅުކުރައްވާފިއެވެ.
ރައީސް ޑރ. މުހައްމަދު މުއިއްޒު އާބަން ސެންޓަރުތަކުގެ ގޮތުގައި ރ. އުނގޫފާރު، ބ. އޭދަފުށި، ޅ. ނައިފަރު، އދ. މަހިބަދޫ، ފ. ނިލަންދޫ، ދ. ކުޑަހުވަދޫ އަދި ލ. ފޮނަދޫ ކަނޑައެޅުއްވިއިރު، މި ލިސްޓުގައި ދެކުނުގެ އެއްވެސް އަތޮޅަކާއި ހއ. އާއި ހދ. ފަދަ ބޮޑެތި އާބާދީތައް ހިމެނޭ އަތޮޅުތައް ހިމަނާފައެއް ނުވެއެވެ.
މިކަމާ ގުޅިގެން ޝާހިދު ކުރެއްވި ޕޯސްޓެއްގައި ވިދާޅުވެފައިވަނީ ބޮޑުތިލަދުންމައްޗާއި ދެކުނު އަތޮޅުތައް މި ލިސްޓުން އުނިވެފައިވާ ސަބަބު ސަރުކާރުން ސާފުކޮށްދޭންޖެހޭނެ ކަމަށާއި، މިފަދަ ނިންމުންތައް ނިންމުމުގައި ކައުންސިލްތަކުގެ މަޝްވަރާ ހޯދަންޖެހޭނެ ކަމަށެވެ.
އަރބަން ސެންޓަރު ކަނޑައެޅުމުގައި ބޮޑުތިލަދުންމައްޗާއި، ރާއްޖޭގެ ދެކުނުގެ ސަރަހައްދު އުނިވެފައި މިވާ ސަބަބު އެސަރަހައްދު ތަކުގައި ދިރިއުޅޭ ރައްޔިތުންނަށް ސަރުކާރުން ސާފުކޮށްދޭންޖެހޭ.
އަދި މިފަދަ ކަންކަން ނިންމުމުގައި ރަށު ކައުންސިލްތަކާއި އަތޮޅު ކައުންސިލްތަކުގެ މަޝްވަރާ… pic.twitter.com/ig3Cpirys8
— Abdulla Shahid (@abdulla_shahid) November 9, 2024
ރައީސް މުއިއްޒު މިކަމާ ގުޅިގެން އެކްސްގައި ކުރެއްވި ޕޯސްޓެއްގައި އާބަން ސެންޓަރުތަކާއި އިންޓަގްރޭޓަޑް ޑިވެލޮޕްމަންޓް ޒޯންގެ ތަފާތު ވަނީ ކިޔައިދެއްވާފައެވެ.
އެގޮތުން މާލެ އާބަން ރީޖަންގެ އިތުރުން، އެންމެ މަތީ ފަންތީގެ ޚިދުމަތްތައް ހިމެނޭގޮތަށް އުތުރުގެ ތިން އަތޮޅު ހިމެނޭ ނޮދަން އިންޓަގްރޭޓަޑް ޑިވެލޮޕްމަންޓް ޒޯނަކާއި، ދެކުނުގެ ހަތަރު އަތޮޅު ހިމެނޭ ސަދަން އިންޓަގްރޭޓަޑް ޑިވެލޮޕްމަންޓް ޒޯނެއް ތަރައްޤީކުރުމުގެ އިތުރުން ހަތް އާބަން ސެންޓަރެއް ތަރައްޤީކުރުމަށް އެމަނިކުފާނުގެ މެނިފެސްޓޯގައި ހިމަނުއްވާފައިވާނެ ކަމަށް ވިދާޅުވިއެވެ.
ޝާހިދު އިތުރަށް ވިދާޅުވެފައިވަނީ އާބަން ސެންޓަރުތައް ކަނޑައެޅުމަކީ ލާމަރުކަޒީ އުސޫލުން ބޭރުން މައި ސަރުކާރުން ކަންކަން ނިންމަން ފެށުމަކަށް ވެގެން ނުވާނެ ކަމަށެވެ.
