ބަންކަރިންގ ޚިދުމަތް ދިނުމަށް އުތުރުގައި ބާއްވާފައި އޮތް ދެ ބޯޓު މާލެ ސަރަހައްދަށް އައުމާ ގުޅިގެން އެ ޚިދުމަތް ހުއްޓިފައިވާ ކަމަށް ބުނެ ބައެއް މީޑިއާތަކުން ގެނެސްދިން ޚަބަރަކަށް އެސްޓީއޯގެ އެމްޑީ ޝިމާދު މިއަދު ދޮގު ކޮށްފިއެވެ.
އޭނާ ވިދާޅުވި ގޮތުގައި "މެރިން ބެލާ" މާލެ ކައިރިއަށް އައީ އޯޑަރަކަށް ތެޔޮ ޑެލިވަރީ ކުރުމަށެވެ. އަދި "މެރިން އެންޖެލްސް" އުޅަނދު މާލެ ސަރަހައްދަށް ގެނެވުނީ އިހަވަންދިއްޕޮޅުގައި ވޯކްޝޮޕްތައް ނެތުމުގެ ސަބަބުން ރޫޓިން މަރާމާތެއް ކުރުމަށެވެ.
ޝިމާދު އިތުރަށް ވިދާޅުވީ ބަންކަރިންގ ޚިދުމަތް މެދުނުކެނޑި ކުރިއަށްދާ ކަމަށާއި، މިފަދަ މުހިންމު އިންވެސްޓްމަންޓްތަކާ ގުޅޭ ޚަބަރުތައް ގެނައުމުގައި ވިސްނުންތެރިކަން އިސްކުރުމަށް ގޮވާލައްވާފައެވެ. އަދި ބަންކަރިންގ ޚިދުމަތާ ގުޅޭ އާ މަޢުލޫމާތުތަކެއް ކުރިއަށް އޮތް ތަނުގައި ހިއްސާކުރެވޭނެ ކަމަށްވެސް އޭނާ ވިދާޅުވިއެވެ.
އެސްޓީއޯއިން ވިޓޯލްއާ ގުޅިގެން އިހަވަންދިއްޕޮޅުގައި ބައިނަލްއަޤްވާމީ ބަންކަރިންގ ޚިދުމަތް ފެށުމަށް 15-20 މިލިއަން ޑޮލަރު އިންވެސްޓްކޮށްފައިވެއެވެ. މި ޚިދުމަތް ފެށުމުގެ ރަސްމިއްޔާތުގައި އިކޮނޮމިކް މިނިސްޓަރު މުޙައްމަދު ސަޢީދު ވިދާޅުވެފައިވަނީ، ރާއްޖެ އޮތް ސަރަހައްދަކީ މުހިންމު ސަރަހައްދެއް ކަމަށާއި، މި ސަރަހައްދުން ދުވާލަކު 300 އެއްހާ ބޯޓު ހުރަސްކުރާއިރު، އޭގެ ކުޑަ އިންސައްތައެއް ނަމަވެސް ރާއްޖެއަށް ލިބިގެންދިއުމަކީ ކުރިއެރުމެއް ކަމަށެވެ.
ސަރުކާރުން ވަނީ ބަންކަރިންގ ޚިދުމަތް އިތުރަށް ފުޅާކޮށް، ހޯރަފުށީގައި ބިން ހިއްކައިގެން ތެޔޮ ޓާމިނަލަކާއި ކޮންޓެއިނަރ ޓާމިނަލެއް އެޅުމަށް ނިންމާފައެވެ. މީގެއިތުރުން ހއ. އުލިގަމުގައި ޔޮޓް މެރީނާއެއް ތަރައްޤީކުރުމަށް ހަމަޖެހިފައިވާއިރު، މިހާރުވެސް އެކަމަށް ހަ ފަރާތަކުން ވަނީ ޝައުޤުވެރިކަން ފާޅުކޮށްފައެވެ.
