އާބަން ސެންޓަރުތަކާ ގުޅޭގޮތުން ސިޔާސީ ފައިދާ ހޯދުމުގެ ނިޔަތުގައި ހަޤީޤަތް އޮޅުވާލަމުންދާ ކަމަށް ރައީސް ޑރ. މުހައްމަދު މުއިއްޒު ވިދާޅުވެއްޖެއެވެ.
މިއަދު އިޢުލާންކޮށްފައިވާ އާބަން ސެންޓަރުތަކުގެ ތެރޭގައި އެންމެ އުތުރާއި އެންމެ ދެކުނުގެ ރަށްތައް ނުހިމެނޭތީ، ބައެއް ފަރާތްތަކުން ވަނީ އެކަމާ ކަންބޮޑުވުން ފާޅުކޮށް ސަރުކާރަށް ފާޑުކިޔާފައެވެ.
މި ފާޑުކިޔުންތަކަށް ރައްދު ދެއްވަމުން ރައީސް އެކްސްގައި ކުރެއްވި ޕޯސްޓެއްގައި ވިދާޅުވެފައިވަނީ، އެމަނިކުފާނުގެ މެނިފެސްޓޯގައިވާ ގޮތަށް މާލެ އާބަން ރީޖަންގެ އިތުރުން، އުތުރުގެ ތިން އަތޮޅު ހިމެނޭ ނޮދަން އިންޓަގްރޭޓެޑް ޑިވެލޮޕްމަންޓް ޒޯނަކާއި، ދެކުނުގެ ހަތަރު އަތޮޅު ހިމެނޭ ސަދަން އިންޓަގްރޭޓެޑް ޑިވެލޮޕްމަންޓް ޒޯނެއް ތަރައްޤީ ކުރައްވާނެ ކަމަށެވެ.
ކަންކަމުގެ ހަގީގަތް ނުބައްލަވާ، ނުވަތަ ހަޤީޤަތް އެނގިވަޑައިގެން ތިއްބަވައިގެން، ސިޔާސީ ފައިދާ ހޯދުމުގެ ނިޔަތުގައި ސިޔާސީ ބައެއް ފަރާތްތަކުން ކުރައްވާ ކަންކަމަށް ޒިންމާވާނީ އެކަންކަން ކުރައްވާ ބޭފުޅުން.
ސަރުކާރުން އާބަން ސެންޓަރުތައް ޤާއިމުކުރުމަށް ހޮވާފައިވަނީ ޅ. ނައިފަރު، ބ. އޭދަފުށި، ރ. އުނގޫފާރު، އދ. މަހިބަދޫ، ފ. ނިލަންދޫ، ދ. ކުޑަހުވަދޫ އަދި ލ. ފޮނަދޫއެވެ.
ހައުސިން މިނިސްޓްރީން މިރޭ ނެރުނު ނޫސްބަޔާނުގައި ބަޔާންކޮށްފައިވާ ގޮތުން، އުތުރުގައި ހއ. އަތޮޅު، ހދ. އަތޮޅު، ށ. އަތޮޅު އަދި ނ. އަތޮޅު ހިމެނޭއިރު، ދެކުނުގައި ގއ. އަތޮޅު، ގދ. އަތޮޅު، ފުވައްމުލަކު ސިޓީ އަދި އައްޑޫ ސިޓީ ހިމެނެއެވެ. މި ދެ ސަރަހައްދުގައިވެސް އާބާދީއާއި ތަރައްޤީ އެއްފަސްކުރުމުގެ ސިޔާސަތުގެ ދަށުން އާބަން ސެންޓަރުތައް ތަރައްޤީ ކުރެވޭނެ ކަމަށް މިނިސްޓްރީން ބުނެފައިވެއެވެ.
