އިސްލާމީ ޝަރީއަތުގައި ވަރިއަކީ ވަރަށް މުހިންމު އަދި ގިނަ ފިޤުހީ ހުކުމްތަކެއް އެކުލެވިގެންވާ ކަމެއްކަމަށާއި، ކައިވެންޏާއި ވަރިއަކީ އެއްވެސް ހާލެއްގައި ސަމާސާކޮށް ކުޅޭ ކަމަކަށް ހެދުން ހުއްދަވެގެން ނުވާކަމެއް ކަމުގައި މިއަދުގެ ހުކުރު ޚުޠުބާގައި ވިދާޅުވެއްޖެއެވެ.
ވަރި ކުރުމާއި އިއްދަ އާ ބެހޭ ހުކުމްތަކުގެ މައްޗަށް އަލިއަޅުވާލައި ހުތުބާގައި ވިދާޅުވީ، ރަސޫލާގެ ހަދީސްފުޅުގައި ވާގޮތުން ކައިވެނި، ވަރި އަދި ރުޖޫޢަވުމަކީ ގަސްތަކާލައިގެން ނުވަތަ ސަމާސާއަކަށް ބުނި ނަމަވެސް އެކަމުގެ ޝަރުޢީ ހުކުމް ހިނގާނެ ކަމެއްކަން ބަޔާންކުރައްވާފައިވެއެވެ. ހަމައެހެންމެ، އިސްލާމްދީނުގައި ކައިވެންޏަކީ މާތް ގުޅުމަކަށްވާއިރު، އެއްވެސް ޝަރުޢީ ސަބަބެއްނެތި އަނބިމީހާ ވަރިއަށް އެދުމަކީ މަނާކުރެވިގެންވާ ކަމެއްކަން ފާހަގަކުރެވުނެވެ.
ހައްގަކާ ނުލައި، ފިރިމީހާގެ ގާތުން ވަރިވާން އެދޭ އަންހެނާގެ މައްޗަށް ސުވަރުގޭގެ ވަސް ހަރާމްވެގެން ވެ އެވެ.
މިއަދުގެ ޚުޠުބާގައި ވިދާޅުވެފައި ވެއެވެ.
ހުތުބާގައި ދެމަފިރިންގެ ދެމެދުގައި ޚިލާފެއް އުފެދިއްޖެނަމަ ވަރިއާ ހަމައަށް ދިއުމުގެ ކުރިން ޢަމަލުކުރަންވީ ގޮތް ވެސް ކިޔައިދެއްވިއެވެ. އެގޮތުން ދެފަރާތުން ނިޔާވެރިން ފޮނުވައި، މައްސަލަ ހައްލުކުރެވޭތޯ ބެލުމަށްފަހު، އެބޭފުޅުންގެ ނިންމުމާ އެއްގޮތަށް ޢަމަލުކުރަންޖެހޭކަން ބަޔާންކުރެއްވިއެވެ.
އަދި ވަރި ހުއްދަވާ ބައެއް ސަބަބުތަކުގެ ތެރޭގައި އަނބިމީހާގެ އަޚްލާޤު ނުބައިވުން، ޒަވާޖީ ހަޔާތުގެ އިންތަކުން ބޭރުވުން އަދި ﷲ ގެ އަމުރުފުޅުތަކަށް އިހުމާލުވުން ހިމެނޭކަން ފާހަގަ ކޮށްފައި ވެއެވެ. މީގެއިތުރުން ފިރިމީހާ އަނބިމީހާއަށް އަނިޔާވެރިވެ، އޭނާގެ ޙައްޤުތައް އަދާނުކުރާނަމަ، އަނބިމީހާއަށް ކައިވެނި ޚުލްޢުކުރުމަށް ހުށަހެޅިދާނެކަން ވެސް ބަޔާންކުރެއްވިއެވެ.
ހުތުބާގައި އިއްދައިގެ މުއްދަތުގައި ޢަމަލުކުރަންޖެހޭ ގޮތްތަކާއި، ތިން ވަރީގެ ހުކުމްތަކާއި، ރަޖުޢީ އަދި ބާއިނު ވަރީގެ މައްޗަށް އަލިއަޅުވާލާފައިވެއެވެ. އަދި މިޒަމާނުގައި ކައިވެންޏާއި ވަރީގެ ކަންކަން ކޯޓުތަކުގައި ރަޖިސްޓްރީކޮށް ބެލެހެއްޓުމުގެ މުހިންމުކަމާއި، އެކަން ނުކޮށްފިނަމަ ކުރިމަތިވެދާނެ އިޖުތިމާޢީ މައްސަލަތަކުގެ ވާހަކަ ވެސް ހިމަނުއްވާފައިވެއެވެ.
