މިސް ޔުނިވާސް މުބާރާތުގައި ރާއްޖެ ތަމްސީލުކުރާ މަރިޔަމް ސައިނާ ނަސީމް، މުބާރާތް ބަލާލުމަށް މެކްސިކޯއަށް ދަތުރުކުރުމުގެ ފުރުސަތު ދެ މީހަކަށް ހުޅުވާލައިފައެވެ.
މި ފުރުސަތު ހޯދުމަށް ޝައުގުވެރިވާ ފަރާތްތަކުން އޭނާގެ އިންސްޓަގްރާމް ރީލްގައި، އޭނާ މުބާރާތުގައި ބައިވެރިވާން ޖެހޭ ސަބަބު ބަޔާންކޮށް ކޮމެންޓް ކުރުމާއެކު، ފަސް ރައްޓެހިން ޓެގްކޮށް، މިސް ޔުނިވާސްގެ އޮފިޝަލް އެކައުންޓާއި ސައިނާގެ އެކައުންޓް ފޮލޯކުރަން ޖެހެއެވެ. އަދި އެމީހުންގެ އިންސްޓަގްރާމް ސްޓޯރީގައި ރީލް ޝެއަރކޮށް، ސައިނާއާއި މިސް ޔުނިވާސްގެ އޮފިޝަލް އެކައުންޓް ޓެގްކުރަންވެސް ޖެހެއެވެ.
މި ޕްރޮމޯޝަނާ ގުޅޭގޮތުން ސައިނާ ހިއްސާކުރި ވީޑިއޯގައި، އޭނާއަށް އެހީތެރިވެދޭ އެންމެހާ ފަރާތްތަކަށް ޝުކުރު އަދާކޮށް، މިސް ޔުނިވާސްގެ ދަތުރުގައި ބައިވެރިވުމަށް ދަޢުވަތުދީފައިވެއެވެ. މީގެއިތުރުން، ރާއްޖޭގެ މިސް ޔުނިވާސް އިންސްޓަގްރާމް އެކައުންޓުން މި މަހުގެ 14 ވަނަ ދުވަހު އޮންނަ ޕްރިލިމިނަރީއާއި ނެޝަނަލް ކޮސްޓިއުމް ޝޯ އަދި 16 ވަނަ ދުވަހު އޮންނަ ފައިނަލް ކޮމްޕެޓިޝަން ބަލަން ވަންނަ ޓިކެޓަށް 20 ޕަސެންޓުގެ ޚާއްޞަ ޑިސްކައުންޓެއް ދެއެވެ.
24 އަހަރުގެ ސައިނާ މިސް ޔުނިވާސްގައި ބައިވެރިވުމަކީ ރާއްޖެއިން ފުރަތަމަ ފަހަރަށް މި މުބާރާތުގައި ބައިވެރިވުމެވެ. ނަމަވެސް މިކަމާ ގުޅިގެން އަމާޒުވި ފާޑުކިޔުންތަކާ ގުޅިގެން ޔޫތު މިނިސްޓްރީން ވަނީ އެކަން ކުށްވެރިކޮށް، މުބާރާތުގައި ބައިވެރިނުވުމަށް ސައިނާއަށް ގޮވާލާ ބަޔާނެއް ނެރެފައެވެ.
