"ހިޔާވެހި ފައިނޭންސް ސްކީމް" ސްކީމަށް އަންނަ އަހަރުގެ ބަޖެޓުގައި އެއް ބިލިއަން ރުފިޔާ ކަނޑައަޅުއްވާފައިވާނެ ކަމުގައި ރައީސް ޑރ. މުޙައްމަދު މުޢިއްޒު ވިދާޅުވެއްޖެއެވެ.
ރައީސް މުއިއްޒު މިހެން ވިދާޅުވީ، ކުޑަ އިންޓްރެސްޓް ރޭޓެއްގައި ގެދޮރު އަޅަން އެހީތެރިވެދޭ "ހިޔާވެހި ފައިނޭންސް ސްކީމް" އިއްޔެ ތަޢާރަފުކުރެއްވުމަށް އިސްލާމީ މަރުކަޒުގައި ބޭއްވުނު ރަސްމިއްޔާތުގައި ވާހަކަފުޅު ދައްކަވަމުންނެވެ.
. ރައްޔިތުންނަށް މިހާރު އެންމެ ދަތިވެފައިވާ ބޯހިޔާވަހިކަމުގެ މައްސަލައަށް ދާއިމީ ހައްލެއް ހޯދައިދިނުމަށް ސަރުކާރުން ގެންގުޅުއްވާ ސިޔާސަތުގެ ދަށުން ތަޢާރަފުކުރެވޭ މި ސްކީމް މެދުވެރިކޮށް އެޗްޑީއެފްސީ، ބީއެމްއެލް އަދި އެމްއައިބީ އިން 5 ޕަސެންޓަށްވުރެ ބޮޑުނުވާ ގޮތަށް ލޯނު ދޫކުރާނެއެވެ. މި ސްކީމްގެ ދަށުން ރާއްޖޭގެ ހުރިހާ ރަށަކަށް އެއް މިލިއަން ރުފިޔާގެ ލޯނާއި، މާލެ ސަރަހައްދަށް ހަ މިލިއަން ރުފިޔާގެ ލޯނު އަދި އާބަން ސަރަހައްދުތަކަށް ތިން މިލިއަން ރުފިޔާގެ ލޯނު ދޫކުރެވޭނެއެވެ. އަމިއްލަ ގޯއްޗެއް ނުވަތަ ބިމެއް އޮވެ ގެ ނޭޅި ތިބި ފަރާތްތަކަށާއި، ގެ އަޅަން ފަށައި ނުނިމި ހުރި ފަރާތްތަކަށާއި، އިމާރާތްކޮށްފައި ހުރި ގެތަކުގެ ތެރެއިން މަރާމާތުކުރަން ޖެހިފައިވާ ގެތަކަށް މި ލޯނުގެ އެހީ ލިބޭނެ ކަމަށް ރައީސް ވިދާޅުވިއެވެ.
ކޮންމެ އަހަރަކުވެސް މި ސްކީމަށް އެއް ބިލިއަން ރުފިޔާ ކަނޑައެޅުމަށް ހަމަޖެހިފައިވާއިރު، އަންނަ އަހަރު ކަނޑައެޅިފައިވާ އެއް ބިލިއަން ރުފިޔާ ބޭނުންކޮށްގެން ދެ ބިލިއަނަށް ވުރެ ގިނަ ރުފިޔާގެ ލޯނު ދޫކުރެވޭނެ ކަމަށް ރައީސް ވިދާޅުވެފައިވެއެވެ.
