ދިރާގުން މިދިޔަ ބުރާސްފަތި ދުވަހު އާންމުކުރި މި އަހަރުގެ ތިންވަނަ ކުއާޓަރުގެ ރިޕޯޓުން ދައްކާ ގޮތުގައި އެ ކުންފުންޏަށް 241 މިލިއަން ރުފިޔާގެ ސާފު ފައިދާއެއް ލިބިއްޖެއެވެ. އަދި އާމްދަނީގެ ގޮތުގައި ޖުމުލަ 691 މިލިއަން ރުފިޔާ ލިބިފައިވާއިރު، އެއީ މިދިޔަ ކުއާޓަރާ އަޅާބަލާއިރު 3.9 މިލިއަން ރުފިޔާގެ ކުރިއެރުމެކެވެ.
މިދިޔަ ކުއާޓަރުގައި ދިރާގަށް ލިބުނީ 687 މިލިއަން ރުފިޔާގެ އާމްދަނީއެވެ.
މި ކުއާޓަރުގައި ލިބުނު އާމްދަނީގެ ތެރޭގައި މޮބައިލް ރެވެނިއުގެ ގޮތުގައި 363 މިލިއަން ރުފިޔާއާއި، ފިކްސްޑް ބްރޯޑްބޭންޑް އެންޑް އެންޓަޕްރައިޒްގެ ގޮތުގައި 306 މިލިއަން ރުފިޔާ ހިމެނެއެވެ. މީގެ އިތުރުން އެހެނިހެން ގޮތްގޮތުން 21 މިލިއަން ރުފިޔާ ލިބިފައިވެއެވެ.
ހިންގުމުގެ ޚަރަދުގެ ގޮތުގައި މި ކުއާޓަރުގައި ދިރާގުން ވަނީ ޖުމުލަ 294 މިލިއަން ރުފިޔާ ހޭދަކޮށްފައެވެ. އޭގެ ތެރޭގައި ޑައިރެކްޓް ކޮސްޓުގެ ގޮތުގައި 110 މިލިއަން ރުފިޔާއާއި، އެހެނިހެން ހިންގުމުގެ ޚަރަދުގެ ގޮތުގައި 185 މިލިއަން ރުފިޔާ ހިމެނެއެވެ. އަދި ޑިޕްރިސިއޭޝަން އެންޑް އެމޯޓައިޒޭޝަންގެ ގޮތުގައި 101 މިލިއަން ރުފިޔާ ހޭދަކޮށްފައިވެއެވެ. އޭގެ އިތުރުން އެހެނިހެން ފައިދާގެ ގޮތުގައި ތިން ލައްކަ ރުފިޔާ ދިރާގަށް ލިބިފައިވެއެވެ.
ހިއްސާގެ އަގަށް ބަލާއިރު، މި ކުއާޓަރުގައި ދިރާގުގެ ހިއްސާއެއްގެ އަގު ހުރީ 3.17 ރުފިޔާގައެވެ. އެއީ މިދިޔަ ކުއާޓަރުގައި 3.16 ރުފިޔާގައި ހުރި އަގެވެ.
