ރާއްޖެ އިން ޕާކިސްތާނަށް ކަނޑައަޅާފައި ހުންނަވާ ސަފީރު މުހައްމަދު ތޯހާ، އަފްޣާނިސްތާނުން ޕާކިސްތާނަށް ކަނޑައަޅާފައި ހުންނަވާ ސަފީރު ސަރުދާރު އަހުމަދު ޝަކީބުއާ ބައްދަލު ކުރެއްވި މައްސަލައިގައި ތޯހާ މަގާމުން ވަކިކޮށް އަނބުރާ ރާއްޖެ ގެންނަން ދިވެހި ސަރުކާރުން ނިންމައިފިއެވެ.
ތޯހާ އަފްޣާނިސްތާނުން ޕާކިސްތާނަށް ކަނޑައަޅާފައިވާ ސަފީރާ ބައްދަލު ކުރެއްވީ ދިވެހި ސަރުކާރުގެ ހުއްދަ ނެތި މިދިޔަ ހުކުރު ދުވަހުއެވެ.
ފޮރިން މިނިސްޓްރީން އިއްޔެ ނެރުނު ބަޔާނެއްގައި ބުނީ އަފްޣާނިސްތާނުގެ މަންދޫބާ، ތޯހާ ބައްދަލުކުރެއްވީ ދިވެހި ސަރުކާރުގެ ހުއްދަ ނެތި ކަމަށާއި އެކަމުގައި އޭނާ އަށް ފިޔަވަޅު އަޅާފައިވާ ކަމަށެވެ. ފޮރިން މިނިސްޓްރީން އެގޮތަށް ބަޔާން ނެރުނީ ތާލިބާން ޖަމާއަތް ރަސްމީކޮށް ބަލައިގަތީތޯ ގިނަ ބަޔަކު ސުވާލު ކުރަމުން ދަނިކޮށެވެ.
ތާލިބާނުންނަކީ އަފްޣާނިސްތާނުގައި މިހާރު ވެރިކަން ކުރަމުން އަންނަ ހަނގުރާމަވެރި ޖަމާއަތެކެވެ.
ތޯހާ އާ މެދުގައި އެޅީ ކޮން ފިޔަވަޅެއް ކަމެއް ފޮރިން މިނިސްޓްރީން ނުބުނެއެވެ.
އެނގިފައިވާ ގޮތުގައި، ސަރުކާރުން ވަނީ ތޯހާ އަނބުރާ ގެންނަން ނިންމައިފައެވެ.
ފޮރިން މިނިސްޓްރީން ބުނީ ރާއްޖެއިން ގައުމުތަކުގެ ސަރުކާރުތައް ބަލައިގަތުމުގައި ސުވާލެއް އުފެދޭ ހާލަތެއްގައި އަބަދުވެސް ބަލަނީ އދ. އިން ކަނޑައަޅާފައިވާ މިންގަޑުތަކާއި އުސޫލުތަކަށް ކަމަށެވެ. އަދި މި އުސޫލުތަކާ އެއްގޮތްވާ ގޮތުގެ މަތިން އދ. ގައި އަފްޣާނިސްތާނު ތަމްސީލުކުރާ ފަރާތަކީ އަފްގާނިސްތާނުގެ ސަރުކާރުގެ ގޮތުގައި ދިވެހި ސަރުކާރުން ބަލައިގަންނަ ފަރާތް ކަމުގައި ފޮރިން މިނިސްޓްރީން ބުންޏެވެ.
ޕާކިސްތާނުގައި ހުންނަވާ ދިވެހި ސަފީރަކަށް ތޯހާ ހަމަޖެއްސުމުގެ ކުރިން އޭނާ ފުރަތަމަ ކަނޑައެޅީ ސައޫދީ އަރަބިއްޔާގެ ސަފީރަކަށެވެ. ސައޫދީ ސަފީރަކަށް ތޯހާ އައްޔަން ކުރަން ފެންނަ ކަމަށް ރައްޔިތުންގެ މަޖިލިހުން ރުހުން ވެސް ދީފައި ވަނިކޮށް، އޭނާ ޕާކިސްތާންގެ ސަފީރަކަށް ބަދަލު ކުރަން ނިންމައި އަލުން ރުހުން ހޯދުމަށް މަޖިލިހަށް ފޮނުވިއެވެ. މި ނިންމުން ސަރުކާރުން ނިންމި ސަބަބެއް ހާމައެއް ނުކުރެއެވެ.
