ޔުނިވާސަލް ޕީރިއޮޑިކް ރިވިއު (ޔޫޕީއާރު) ގެ 47 ވަނަ ބައްދަލުވުން ސްވިޒަލޭންޑްގެ ޖެނީވާގައި ހުންނަ އދ. ގެ އޮފީހުގައި މިއަދު ފަށައިފިއެވެ.
ދެ ހަފްތާގެ މުއްދަތަކަށް ކުރިއަށްދާ މި ސެޝަން، މި ހިނގާ ނޮވެމްބަރު މަހުގެ 4 އިން 15 ގެ ނިޔަލަށް ކުރިއަށްދާނެއެވެ. މި ސެޝަންގައި 14 ގައުމެއްގައި އިންސާނީ ހައްގުތައް ނަގަހައްޓާ މިންވަރު ވަޒަން ކުރުމަށް ވަނީ ހަމަޖެހިފައެވެ. މި 14 ގައުމަކީ އަލްބޭނިއާ، ބޫޓާން، ބްރުނާއި ދާރުއްސަލާމް، ޑިމޮކްރެޓިކް ރިޕަބްލިކް އޮފް ދަ ކޮންގޯ، ކޮސްޓަ ރީކާ، ކޮޓް ޑިވުއާ، ޑޮމިނިކާ، އިކުއިޓޯރިއަލް ގިނީ، އިތިއޯޕިއާ، ޑިމޮކްރެޓިކް ޕީޕަލްސް ރިޕަބްލިކް އޮފް ކޮރެއާ، ނިކަރާގުއާ، ނޯރވޭ، ޕޯޗުގަލް އަދި ގަތަރެވެ.
ޔޫޕީއާރު ވޯކިން ގްރޫޕުގެ ތިން ބައްދަލުވުމެއް އިންސާނީ ހައްގުތަކާ ބެހޭ ކައުންސިލުގައި ކޮންމެ އަހަރަކު ބާއްވައެވެ. އެގޮތުން، 2022 ވަނަ އަހަރުގެ ނޮވެމްބަރު މަހުން ފެށިގެން މިހާރު ކުރިއަށްދާ 4 ވަނަ ޔޫޕީއާރު ސައިކަލް 2027 ވަނަ އަހަރާ ހަމައަށް ކުރިއަށްދާނެއެވެ.
ޔުނިވަސަލް ޕީރިއަޑިކް ރިވިއުއަކީ އ.ދ. ގެ މެމްބަރު ގައުމުތަކުގައި އިންސާނީ ހައްގުތަކުގެ ހާލަތު ވަޒަންކޮށް ދެނެގަތުމަށް އެ ޖަމިއްޔާ އިން ކަނޑައަޅާފައިވާ ނިޒާމެކެވެ. އަދި އިންސާނީ ހައްގުތަކުގެ ހާލަތު ރަނގަޅުކުރުމަށާއި، އިންސާނީ ހައްގުތައް ކަށަވަރުކުރުމުގައި މެމްބަރު ގައުމުތަކުން ހޯދާފައިވާ ކުރިއެރުން އ.ދ ގެ އިންސާނީ ހައްގުތަކާ ބެހޭ ކައުންސިލަށް ހުށަހެޅުމުގެ ފުރުސަތު، ޔޫޕީއާރު މެދުވެރިކޮށް އެ ގައުމުތަކަށް ލިބެއެވެ. ޔޫޕީއާރުގެ ނިޒާމު ގާއިމުކޮށްފައިވަނީ އިންސާނީ ހައްގުތަކާ ބެހޭ އިލްތިޒާމުތައް އުފުލުމުގައި މެންބަރު ގައުމުތަކުން އިތުރަށް ރަނގަޅުކުރަން ފެންނަ ކަންކަން ހުށަހަޅައި، އެ ގައުމުތަކުން ކުރަމުން އަންނަ މަސައްކަތް އަގުވަޒަންކުރެވޭނެ ފަދަ ގޮތަކަށެވެ.
ޔޫޕީއާރު ވޯކިން ގްރޫޕްގެ ބައްދަލުވުންތަކުގައި ކަނޑައެޅިފައިވާ ކޮންމެ ގައުމެއްގެ އިންސާނީ ހައްގުތަކުގެ ހާލަތު ވަޒަންކުރުމަށް އެހީތެރިވުމުގެ ގޮތުން އދ.ގެ އިންސާނީ ހައްގުތަކާ ބެހޭ ކައުންސިލްގެ ތިން މެމްބަރުން "ޓްރޮއިކާ" ގެ ގޮތުގައި ހަރަކާތްތެރިވެއެވެ. އެގޮތުން، މިފަހަރުގެ ބައްދަލުވުމުގައި އ.ދ. ގެ އިންސާނީ ހައްގުތަކާ ބެހޭ ކައުންސިލްގެ މެމްބަރެއްގެ ހައިސިއްޔަތުން ދިވެހިރާއްޖެއިން ޤަތަރުގެ ރިވިއުގައި ޓްރޮއިކާ ގެ މެމްބަރުކަން ކުރާނެއެވެ.
ޔޫޕީއާރުގެ 47 ވަނަ ބައްދަލުވުމުގައި ދިވެހިރާއްޖެއިން ބައިވެރިވާ ވަފުދުގައި އެންމެ އިސްކޮށް ހުންނަވާނީ ޖެނީވާގައި ހުންނަ އދ.ގެ އޮފީހާއި އެހެނިހެން ބައިނަލްއަގްވާމީ ޖަމުޢިއްޔާތަކަށް ކަނޑައަޅާފައި ހުންނަ ދިވެހިރާއްޖޭގެ ދާއިމީ މަންދޫބު ޑރ. ސަލްމާ ރަޝީދެވެ. އަދި މިވަފުދުގައި ކައުންސެލަރ އަލްފާޟިލް އާދަމް ހާމިދު، ކައުންސެލަރ އަލްއުސްތާޛާ އާމިނަތު ޝިފާޔާ އިބްރާހީމް، ސެކަންޑް ސެކްރެޓަރީ އަލްފާޟިލާ މަރްޔަމް ފާތިކާ ފަޔާޒް އަދި އެޓާޝޭ އަލްފާޟިލް މުޙައްމަދު ރާއިދު ސައީދު ހިމެނެއެވެ. މިފަހަރުގެ ޔޫ.ޕީ.އާރު. ބައްދަލުވުމުގައިވެސް ދިވެހިރާއްޖޭގެ ވަފުދުން ބައިވެރިވެ، ދިވެހި ސަރުކާރުގެ މުހިންމު ސިޔާސަތުތަކާ އެއްގޮތްވާ ގޮތުގެ މަތިން ބިނާކުރަނިވި އިސްލާޙުތަކެއް ރިވިއު ކުރެވޭ ގައުމުތަކަށް ހުށަހަޅާނެއެވެ.
