ދައުލަތަށް ފާއިތުވި ތިން މަހުގެ ތެރޭގައި ޓީޖީއެސްޓީގެ ގޮތުގައި ލިބުނު އާމްދަނީ 115.63 މިލިއަން ޑޮލަރަށް އަރާފައިވާކަން މޯލްޑިވްސް އިންލެންޑް ރެވެނިއު އޮތޯރިޓީ (މީރާ) އިން ދައްކާ އެންމެ ފަހުގެ ތަފާސްހިސާބުތަކުން ހާމަވެއްޖެއެވެ.
މިއީ މިދިޔަ އަހަރުގެ މި މުއްދަތާ އަޅާބަލާއިރު 10.7 އިންސައްތައިގެ އިތުރުވުމެކެވެ. މީރާގެ ތަފާސްހިސާބުތަކުން ދައްކާގޮތުގައި މިދިޔަ އަހަރުގެ މި މުއްދަތުގައި ޓީޖީއެސްޓީގެ ގޮތުގައި ލިބިފައިވަނީ 104.45 މިލިއަން ޑޮލަރެވެ. މިއަހަރު ޓީޖީއެސްޓީގެ އާމްދަނީ 11.19 މިލިއަން ޑޮލަރުން އިތުރުވެފައިވާކަން ފާހަގަކުރެވެއެވެ.
ދައުލަތަށް ނިމިދިޔަ ކުއާޓަރުގައި އެންމެ ގިނަ އާމްދަނީއެއް ލިބިފައިވަނީ ޓީޖީއެސްޓީގެ ގޮތުގައެވެ. މުޅި ކުއާޓަރުގައި ދައުލަތަށް ޑޮލަރުން ލިބުނު ޖުމުލަ އާމްދަނީ 240.65 މިލިއަން ޑޮލަރަށް އަރާފައިވާއިރު، މިއީ މިދިޔަ އަހަރުގެ މި މުއްދަތާ އަޅާބަލާއިރު 11 އިންސައްތައިގެ ކުރިއެރުމެކެވެ.
އަދި ޓީޖީއެސްޓީއާއި ޓޫރިޒަމް ބިމު ކުލި އަދި އެއާޕޯޓް ޑިވެލޮޕްމަންޓް ފީގެ ގޮތުގައި ލިބުނު އާމްދަނީ އިތުރުވެފައިވީނަމަވެސް، އިންކަމް ޓެކުހުގެ ގޮތުގައި ލިބުނު އާމްދަނީ 13 އިންސައްތަ ދަށްވެފައިވާކަން ފާހަގަކުރެވެއެވެ.
