މޯލްޑިވްސް އިސްލާމިކް ބޭންކް (އެމްއައިބީ) އިން އެ ބޭންކުގެ މޯބައިލް އެޕްލިކޭޝަން އަޕްގްރޭޑްކޮށް، އައު ޚިދުމަތްތަކެއް ތަޢާރަފުކޮށްފިއެވެ.
ހުޅުމާލެ ސެންޓްރަލް ޕާކުގައި ހަވާ އެރުވުމާއެކު ބޭއްވި ހަފްލާގައި ދައްކާލި އައު މޯބައިލް އެޕްލިކޭޝަނުގައި ވަނީ އެކްސެސް އޮތް އެހެން އެކައުންޓުތަކަށް ސްވިޗްކުރުމުގެ ފީޗަރ ހިމަނާފައެވެ. މީގެ އިތުރުން، ފަސޭހަކަމާއެކު ޓްރާންސެކްޝަންތައް އެޕްރޫވްކުރުމުގެ ޚިދުމަތާއި، ކަސްޓަމަރުންނަށް ބޭނުންކޮށްލަން ފަސޭހަ ގިނަ ކަންކަންވެސް އެޕްގައި ހިމަނާފައިވެއެވެ.
އެމްއައިބީން އަލަށް ތަޢާރަފުކުރި "ބިންގާ ކިޑްސް އެކައުންޓް" ގެ ތެރޭގައި ތަފާތު ތިން ބާވަތެއްގެ އެކައުންޓު ހިމެނޭ ބަންޑަލް ޕެކޭޖެއް ލިބޭނެއެވެ. އެއީ ބިންގާ ޓްރާންސެކްޝަން އެކައުންޓާއި، ބިންގާ ސޭވިންގ އެކައުންޓު، އަދި ބިންގާ އިންވެސްޓްމަންޓް އެކައުންޓެވެ. މި އެކައުންޓު މެދުވެރިކޮށް ދަރިން މާލީގޮތުން ޒިންމާދާރުކުރުވުމަށް ބެލެނިވެރިންގެ ބެލުމުގެ ދަށުން ބޭނުންކުރެވޭ ކޭޝް ކާޑެއް ލިބޭނެއެވެ. އަދި ޚަރަދުކުރެވޭ ލިމިޓް ބެލެނިވެރިންނަށް ކަނޑައެޅުމުގެ އިތުރުން ދަރިންނަށް ފަހަށް ރައްކާކުރުމަށްވެސް މި އެކައުންޓުން ބާރުއަޅައެވެ.
ހަފްލާގައި ރާއްޖޭގެ މާޙައުލަށް އަލަށް ތަޢާރަފުކުރި ކޭޝް ކާޑުގެ ބަދަލުގައި ބޭނުންކުރެވޭ އަނގޮޓި، އާދީއްތަ ދުވަހުން ފެށިގެން މާލޭ ބިޒްނަސް ސެންޓަރު، ހ. މެރިންޑްރީމް އަދި ރަށްރަށުގައި ޤާއިމުކޮށްފައި ހުންނަ ބްރާންޗުތަކުން ލިބެން ހުންނާނެއެވެ. މި އަނގޮޓި ކޭޝް ކާޑާ ދާދި އެއްގޮތަކަށް މަސައްކަތްކުރާއިރު، އެކި ޑިޒައިނާއި ސައިޒުތަކުގައި ލިބެން ހުންނާނެއެވެ.
ޒަމާނީ ވަސީލަތްތަކުގެ އެހީގައި ބޭންކިންގ ޚިދުމަތްތައް ދެމުންއަންނަ އެމްއައިބީއަކީ ބޭންކަށް ނުގޮސް ވަގުތުން އެކައުންޓު ހުޅުވުމުގެ ޚިދުމަތްދޭ ހަމައެކަނި ބޭންކެވެ. މިހާރު ވިޔަފާރި އެކައުންޓުވެސް އޮންލައިންކޮށް ހުޅުވޭއިރު، އަލަށް ތަޢާރަފުކުރި ޚިދުމަތްތަކާއެކު އެކި ޚިދުމަތްތައް ހޯދުމަށް އިތުރަށް ފަސޭހަވާނެ ކަމަށް އެ ބޭންކުން ބުނެފައިވެއެވެ.
