ކުރީގެ ނާއިބު ރައީސް އަބްދުﷲ ޖިހާދުގެ ކޮރަޕްޝަން މައްސަލަ ބަލައިނުގަތުމަށް ހައި ކޯޓުން އިއްޔެ ނިންމި ނިންމުން ރިވިއު ކުރުމަށް ފަނޑިޔާރުންގެ މަޖިލީހަށް ހުށަހެޅުމަށް ޕްރޮސިކިއުޓާ ޖެނެރަލްގެ އޮފީހުން ނިންމައިފިއެވެ.
މޯލްޑިވްސް އިންޓަނޭޝަނަލް ފައިނޭންޝަލް ސާވިސަސް އޮތޯރިޓީ ބޯޑުގެ ޗެއާޕާސަންގެ މަގާމުގައި މިވަގުތު ހުންނެވި ޖިހާދުގެ މައްޗަށް މި މައްސަލަ އަލުން ހުށަހެޅުމަށް ދެވުނު މުއްދަތުގެ ތެރޭގައި ޕްރޮސިކިއުޓާ ޖެނެރަލްގެ އޮފީހުން އެކަން ނުކުރުމުން ހައި ކޯޓުން މައްސަލަ ބަލައިނުގަތުމަށް ނިންމާފައިވެއެވެ.
ޕްރޮސިކިއުޓާ ޖެނެރަލް އޮފީހުގެ މީޑިއާ އޮފިޝަލް އަދި ޕަބްލިކް ޕްރޮސިކިއުޓާ ޝަފީއު އަހުމަދު ވިދާޅުވި ގޮތުގައި މާދަމާގެ ވަގުތެއްގައި މި ނިންމުން ރިވިއު ކުރުމަށް އެދި ފަނޑިޔާރުންގެ މަޖިލީހަށް ހުށަހަޅާނެއެވެ.
ކުރީގެ ފިނޭންސް މިނިސްޓަރު ޖިހާދުގެ މައްޗަށް ކޮރަޕްޝަންގެ ދައުވާ އުފުލާފައިވަނީ ކ. ފުށިދިއްގަރުފަޅު ސްޕެޝަލް ޓޫރިސްޓް ޒޯނެއްގެ ގޮތުގައި ތަރައްގީކުރުމުގެ މަޝްރޫއާ ގުޅިގެންނެވެ. މި މައްސަލައިގައި ދައުވާކޮށްފައިވަނީ ރައްޔިތުންނަށް ނުވަތަ ދައުލަތަށް ފައިދާއެއް ވާން އޮތް ކަމެއްގައި އެނޫން ގޮތަކަށް އަމަލުކުރުމުގެ ކުށުގެ ދައުވާއެވެ.
ނަމަވެސް މައްސަލައިގެ ތަހުގީގީ މަރުހަލާގައި މައްސަލަތަކެއް ހުރިކަން ފާހަގަކޮށް، މިދިޔަ ޖުލައި 25 ވަނަ ދުވަހު ކްރިމިނަލް ކޯޓުން މައްސަލަ ބޭރުކޮށްލިއެވެ. އޭގެ ފަހުން މިދިޔަ މަހުގެ 11 ވަނަ ދުވަހު އޭރުގެ ޕްރޮސިކިއުޓަރ ޖެނެރަލް ހުސެއިން ޝަމީމް އެ މައްސަލަ ހައިކޯޓުގައި އިސްތިއުނާފު ކުރިއެވެ.
ހައިކޯޓުން މައްސަލަ ބަލައިގަތް ނަމަވެސް، ޖިހާދަށް ކޯޓު އަމުރު ރައްދުކުރުމަށް ދަތިތަކެއް ދިމާވެފައިވާތީ، އެކަން ހައްލުކުރުމަށްފަހު ނުވަތަ ޖިހާދު އުޅޭ އެޑްރެހެއް ހޯދުމަށްފަހު 15 ދުވަހުގެ ތެރޭގައި މައްސަލަ އަލުން ހުށަހެޅުމަށް ފުރުސަތު ދިނެވެ. އެހެންނަމަވެސް، މުއްދަތު ހަމަވެފައިވަނިކޮށް ޕްރޮސިކިއުޓަރ ޖެނެރަލްގެ އޮފީހުން މައްސަލަ ހުށަހެޅުމުން ކޯޓުން ވަނީ މައްސަލަ ބަލައިނުގަންނަން ނިންމާފައެވެ.
މި މައްސަލައިގައި ޕްރޮސިކިއުޓަރ ޖެނެރަލްގެ އޮފީހުން ބުނެފައިވާ ގޮތުގައި، ފުށިދިއްގަރު ސްޕެޝަލް ޓޫރިސްޓް ޒޯނެއްގެ ގޮތުގައި ތަރައްގީކުރުމަށް 2011 ވަނަ އަހަރުގެ ނޮވެމްބަރު 29 ވަނަ ދުވަހު ވަޒީރުންގެ މަޖިލީހުން ނިންމީ ސަރުކާރުގެ 50 ޕަސެންޓް ހިއްސާވާ ގޮތަށް ޖޮއިންޓް ވެންޗަރ އެއްބަސްވުމެއް ހެދުމަށެވެ. އެހެންނަމަވެސް ޖިހާދު އެއްބަސްވުމުގައި ސޮއިކުރެއްވީ ސަރުކާރުގެ ހިއްސާ 25 ޕަސެންޓަށް ކުޑަކޮށްގެންނެވެ. މިކަމުގެ ސަބަބުން ބިމު ކުލީގެ ގޮތުގައި ވެސް 604 މިލިއަނަށްވުރެ ގިނަ ޑޮލަރުގެ ގެއްލުން ދައުލަތަށް ވެފައިވާ ކަމަށް ޕްރޮސިކިއުޓަރ ޖެނެރަލްގެ އޮފީހުން ބުނެއެވެ.
