ރާއްޖޭގެ ގައުމީ އެއާލައިން، މޯލްޑިވިއަން ހިންގާ އައިލެންޑް އޭވިއޭޝަންގެ މާލީ ހާލަތު ރަނގަޅު ކުރުމަށް ކުރާ މަސައްކަތާއި ކުންފުނީގެ ލޯނުތަކުގެ މައުލޫމާތު ހިއްސާކުރަން ބޭއްވި ރައްޔިތުންގެ މަޖިލީހުގެ އެސްއޯއީ ކޮމެޓީގެ ސަބް ކޮމިޓީގެ ބައްދަލުވުން ސިއްރުކޮށްފިއެވެ.

މި ސަބް ކޮމިޓީގައި ހިމެނެނީ ކިނބިދޫ ދާއިރާގެ މެމްބަރު އަލީ އަޝްރަގާއި މާވަށު ދާއިރާގެ މެމްބަރު އަހުމަދު ޝާކިރާއި ދުވާފަރު ދާއިރާގެ މެމްބަރު މުހައްމަދު އަލީ އާއި ފޭދޫ ދެކުނު ދާއިރާގެ މެމްބަރު އިބްރާހިމް ދީދީއެވެ. އެ ބައްދަލުވުން ސިއްރު ކުރަން ހުށަހެޅުއްވީ ފޭދޫ ދެކުނު ދާއިރާގެ މެންބަރު އިބްރާހިމް ދީދީއެވެ.

އެސްއޯއީ ކޮމިޓީގެ މި ސަބް ކޮމިޓީއަކީ އައިލެންޑް އޭވިއޭޝަނާއި އެމްއޭސީއެލް އާއި ރީޖަނަލް އެއާޕޯޓްސްގެ އިތުރުން އައްޑޫ އިންޓަނޭޝަނަލް އެއާޕޯޓުގެ ކުންފުންޏާ ގުޅޭ މައްސަލަތައް ބެލުމަށާއި ދިރާސާ ކުރުމަށް އެކުލަވާލާފައިވާ ސަބް ކޮމިޓީއެކެވެ.

ގައުމީ އެއާލައިން މޯލްޑިވިއަން ހިންގާ، އައިލެންޑް އޭވިއޭޝަނަށް މިދިޔަ އަހަރު ވަނީ 71 މިލިއަން ރުފިޔާގެ ގެއްލުންވެފައެވެ. ދިޔަ އަހަރު ނިމުނުއިރު އެކުންފުނީގެ ދަރަނި ހުރީ 515 މިލިއަން ރުފިޔާގައެވެ.