މ. މުލަކުގައި 500 ޓަނުގެ ކޯލްޑް ސްޓޯރޭޖް ފެސިލިޓީއެއް އެޅުމަށް ނިންމައި އެއްބަސްވުމުގައި ސޮއިކޮށްފިއެވެ.
މިއީ ފިޝަރީޒް މިނިސްޓްރީ އާއި ސައުދީ އަރަބިއްޔާގެ އާރްއޯއެސް ފޯ ޓްރޭޑިންގް ކުންފުންޏާ ދެމެދު ގާއިމުކުރި އެއްބަސްވުމެކެވެ.
ފިޝަރީޒް މިނިސްޓްރީގެ ފަރާތުން އެއްބަސްވުމުގައި ސޮއިކުރެއްވީ ޑިރެކްޓަރު ޖެނެރަލް އީނާސް ނަސީރުއެވެ. އަދި އާރުއޯއެސް ފޯ ޓްރޭޑިން ކުންފުނީގެ ފަރާތުން ސޮއިކުރެއްވީ އެ ކުންފުނީގެ ޑެޕިއުޓީ ޑައިރެކްޓަރ ހަމަދު މުޙައްމަދު އަލްމިންހާލީއެވެ.
މިނިސްޓްރީން ބުނީ ސޮއިކުރި އެއްބަސްވުމުގެ ދަށުން މުލަކުގައި އަޅާ 500 ޓަނުގެ ކޯލްޑް ސްޓޯރޭޖްގައި ދުވާލަކު 50 ޓަނު މަސް ބްރައިން ފްރީޒްކުރުމުގެ ގާބިލްކަން ހުންނާނެއެވެ. މި ތަން އަޅައި ނިންމަން ޖެހޭނީ 300 ދުވަސް ތެރޭގައެވެ.
މި މަޝްރޫއަށް ފަސް މިލިއަން ޑޮލަރު ހަރަދު ކުރުމަށް ވަނީ ހަމަޖެހިފައެވެ.
ފިޝަރީޒް މިނިސްޓްރީން ބުނީ މި ފެސިލިޓީ ގާއިމުކުރުމުން މ. އަތޮޅުގެ މަސްވެރިންނަށް ބޮޑު ލުޔެއް ލިބި، މަސްވެރިކަމުގެ ސިނާޢަތަށް އިތުރު ކުރިއެރުމެއް ލިބިގެންދާނެ ކަމަށް ބެލެވޭ ކަމަށެވެ.
