ސަޕްލިމެންޓްރީ ބަޖެޓު ދިރާސާ ކުރަން އެކުލަވާލި ބަޖެޓު ކޮމިޓީގެ މުގައްރިރަކަށް ފުވައްމުލަކު މެދު ދާއިރާގެ ޕީއެންސީގެ މެމްބަރު އަލީ ފަޒާދު އައްޔަންކޮށްފިއެވެ.
މި ބަޖެޓް ދިރާސާ ކުރާ ކޮމިޓީގެ މުގައްރިރަކަށް ފަޒާދު އައްޔަން ކުރީ މިއަދެވެ. ކޮމިޓީގެ އަޣުލަބިއްޔަތުން އެގޮތަށް ފާސްކުރިއިރު، ބަޖެޓު ކޮމިޓީގެ ނައިބު ރައީސަކަށް ކަނޑައަޅާފައިވަނީ އޭދަފުށީ ދާއިރާގެ މެމްބަރު އަހުމަދު ސަލީމެވެ.
ސަރުކާރުން މަޖިލީހަށް ހުށަހެޅި 5.1 ބިލިއަން ރުފިޔާގެ ސަޕްލިމެންޓްރީ ބަޖެޓެއް ހުށަހަޅާފައިވާއިރު، މި ބަޖެޓުގައި ރިކަރަންޓް ޚަރަދުގެ ގޮތުގައި 1.5 ބިލިއަން ރުފިޔާ އާއި ކެޕިޓަލް ޚަރަދުގެ ގޮތުގައި 3.5 ބިލިޔަން ރުފިޔާ ހިމެނިފައިވެއެވެ.
ސަޕްލިމެންޓްރީ ބަޖެޓާ އެކު ޖުމްލަ ބަޖެޓުގެ ޑެފިސިޓު 18 ބިލިއަނަށް އަރައިގެންދާނެއެވެ. އަދި ޖުމްލަ ބަޖެޓުގެ އަދަދު 55 ބިލިއަން ރުފިޔާއަށް އަރާނެއެވެ.
ސަޕްލިމެންޓްރީ ބަޖެޓުން އެންމެ ބޮޑު ބައެއް ހޭދަކުރަނީ ޕީއެސްއައިޕީ ޕްރޮޖެކްޓްތަކަށެވެ. ފަސް ބިލިއަން ރުފިޔާގެ ބަޖެޓުން ދެ ބިލިއަން ކަނޑައަޅާފައިވަނީ ޕީއެސްއައިޕީ މަޝްރޫއުތަކަށެވެ. ޕީއެސްއައިޕީގެ އިތުރުން ސަބްސިޑީއަށް ވެސް ބަޖެޓުން ވަނީ އެއް ބިލިއަން ރުފިޔާ ކަނޑައަޅައިފައެވެ.
