ރައްޔިތުންގެ މަޖިލީހުގެ އިދާރާގެ މީޑިއާ ޑިރެކްޓަރުގެ މަގާމަށް މީހަކު ހޯދަން އިއުލާންކޮށްފިއެވެ.
މަޖިލިހުގެ މީޑިއާ ޑިރެކްޓަރުގެ މަގާމުގައި މި ފަހަކާ ޖެހެންދެން ހުންނެވީ ހަސަން ޒިޔާއުއެވެ.
ރައްޔިތުންގެ މަޖިލީހުގެ އިދާރާއިން ކުރި އިއުލާނެއްގައި ބުނީ، އެ އިދާރާގެ މީޑިއާ އެންޑް ކޮމިއުނިކޭޝަން ސެކްޝަންގެ ލެޖިސްލޭޓިވް އެފެއާޒް ޑިޕާޓްމަންޓަށް ޑިރެކްޓަރު ހޯދަން ބޭނުންވާ ކަަމަށެވެ.
އެ މަގާމަށް ކުރިމަތިލާ މީހުންގެ ހުންނަން ޖެހޭ ޝަރުތުތަކުގެ ތެރޭގައި
- ނޫސްވެރިކަމުގެ ދާއިރާއިން މާސްޓާސް ޑިގްރީ ހާސިލްކޮށްފައިވުމާއެކު މަގާމުގެ މަސައްކަތްކުރުމުގެ ހުނަރު/ޤާބިލްކަން ސާބިތުކޮށްދިނުން ނުވަތަ
- ނޫސްވެރިކަމުގެ ދާއިރާއިން ޕޯސްޓް ގްރެޖުއޭޓް ސެޓްފިކެޓް/ޕޯސްޓް ގްރެޖުއޭޓް ޑިޕްލޮމާ ހާސިލްކޮށްފައިވުމާއެކު، މަގާމުގެ މަސައްކަތްކުރުމުގެ ހުނަރު/ގާބިލްކަން ސާބިތުކޮށްދިނުން އަދި ނޫސްވެރިކަމުގެ ދާއިރާއިން 3 އަހަރު ދުވަހުގެ މަސައްކަތު ތަޖުރިބާ ލިބިފައިވުން، ނުވަތަ
- ނޫސްވެރިކަމުގެ ދާއިރާއިން ބެޗްލަރސް ޑިގްރީ ހާސިލްކޮށްފައިވުމާއެކު، މަޤާމުގެ މަސައްކަތްކުރުމުގެ ހުނަރު/ޤާބިލްކަން ސާބިތުކޮށްދިނުން އަދި ނޫސްވެރިކަމުގެ ދާއިރާއިން މަދުވެގެން 6 އަހަރު ދުވަހުގެ މަސައްކަތު ތަޖުރިބާ ލިބިފައިވުން.
މި މަގާމަށް ހޮވޭ މީހެއްގެ މުސާރައަކީ 15،950ރ. އެވެ. އަދި ހާޒިރީ އެލަވަންސްގެ ގޮތުގައި ވަޒީފާއަށް ހާޒިރުވާ ކޮންމެ ދުވަހަކަށް 200ރ. ލިވިންގ އެލަވަންސްގެ ގޮތުގައި މަހަކު 3500ރ.، ހާއްސަ އެލަވަންސްގެ ގޮތުގައި އަސާސީ މުސާރައިގެ %20، އަދި ހަމަޖެހިފައިވާ އުސޫލުން ޕްރޮފެޝަނަލް އެލަވަންސް އާއި ފޯން އެލަވަންސްގެ ގޮތުގައި މަހަކު 600ރ.ގެ އިތުރުން އިތުރުގަޑީގައި މަސައްކަތްކުރާނަމަ ހަމަޖެހިފައިވާ އުސޫލުން އިތުރުގަޑީގެ ފައިސާ ދެވޭނެ ކަމަށް އެ އިއުލާނުގައި ވެއެވެ.
މި މަގާމަށް އަންނަ މަހުގެ ހަތް ވަނަ ދުވަހުގެ ނިޔަލަށް ކުރިމަތިލެވޭނެއެވެ.
