އަނބި ދަރީންނަށް ރިޒުގު ތަނަވަސް ކޮށްދޭން މަސައްކަތް ކުރުމަކީ ﷲގެ މަގުގައި ޖިހާދުކުރުން ފަދަ ސާވާބު މަތިވެރިކަމެއް ކަމުގައި މިއަދުގެ ހުކުރު ޚުޠުބާގައި ވިދާޅުވެއްޖެއެވެ.
"އަނބި ދަރީންނަށް ޚަރަދު ކުރުން" މި މައުޟޫއަށް ޚާއްސަ ކުރެވިގެންދިޔަ މިއަދުގެ ހުކުރު ޚުޠުބާގައި ވިދާޅުވީ ފިރިމީހާގެ މުދަލުން އަނބިމީހާއަށް ހޭދަ ނުކުރާނަމަ އޭނާ އިޒުނައާ ނުލާވެސް އަސާސީ ހާޖަތްތައް ފުއްދޭ މިންވަރަށް ފިރިމީހާގެ މުދަލުން ނަގައި ހޭދަކުރުން އަނބިމީހާއަށް ހުއްދަ ވާނެކަމުގައެވެ. އަދި އެކަމުގައި ވަކިކަމެއް ޚާއްސަވެގެން ނުވާކަމުގައިވެސް ޚުޠުބާގައި ވިދާޅުވެފައި ވެއެވެ.
ފިރިމީހާއަކީ މާތްﷲ ވަރަށް މަތިވެރި އަމާނާތެއް ހަވާލުކުރައްވާފައިވާ ބައެކެވެ. އޭނާއަށް ހަވާލުކުރެވިފައިވާ އެންމެ ބޮޑު އަމާނާތަކީ އޭނާގެ އަނބި ދަރީންނެވެ. އަނބި ދަރީންނަށް ޚަރަދު ކުރުމަކީ ފިރިމީހާގެ މައްޗަށް ވާޖިބުވާ ކަމަކަށް ވާއިރު، އެ ވާޖިބު އަދާކުރުން މަތީ ދެމި ތިބުމަކީ ނުހަނު މަތިވެރި ސަވާބާ ދަރުމަ ހުރި ކަމެކެވެ.
މިއަދުގެ ޚުޠުބާގައި ވިދާޅުވެފައި ވެއެވެ.
ޚުޠުބާގައި އިތުރަށް ވިދާޅުވީ، ނަމަވެސް ހިތާމައަކީ މިހާރަކަށް އައިސް ބައެއް ފިރިން އަނބީންނަށް ޚަރަދު ނުކޮށް އެކަމަށް އިހުނާލުވަމުންދާ ކަން ކަމުގައެވެ. އަދި ދެމަފިރީން ވަރިވުމުން ދަރީންނަށް ޚަރަދު ނުދީ ފިލައިގެން އުޅޭ މީހުންވެސް މަދު ނޫންކަމުގައިވެސް ޚުޠުބާގައި ވިދާޅުވެފައި ވެއެވެ.
މިއީ އިންތިހާއަށް ހިތާމަކުރާންޖެހޭ ކަމެއް ކަމަށާއި، މިއީ ގިޔާމަތްދުވަހުން ސުވާލު ކުރެވޭނެ ކަމެއް ކަމުގައިވެސް މިއަދުގެ ޚުޠުބާގައި ވިދާޅުވެފައި ވެއެވެ.
