ސަރުކާރުން ރައްޔިތުންގެ މަޖިލީހަށް އިއްޔެ ހުށަހެޅި ސަޕްލިމެންޓްރީ ބަޖެޓުގައި އޮތީ ހުސް އޮޅުވާލުން ކަމަށް ކުރީގެ ރައީސް އަބްދުﷲ ޔާމީން ވިދާޅުވެއްޖެ އެވެ.
ސަރުކާރުން މަޖިލީހަށް ހުށަހެޅި 5.1 ބިލިއަން ރުފިޔާގެ ސަޕްލިމެންޓްރީ ބަޖެޓެއް ހުށަހަޅާފައިވާއިރު، މި ބަޖެޓުގައި ރިކަރަންޓް ޚަރަދުގެ ގޮތުގައި 1.5 ބިލިއަން ރުފިޔާ އާއި ކެޕިޓަލް ޚަރަދުގެ ގޮތުގައި 3.5 ބިލިޔަން ރުފިޔާ ހިމެނިފައިވެއެވެ. ނަމަވެސް، ޕީއެންއެފުގެ ފްރޮންޓް އޮފީހުގެ ޖަލްސާގައި ވާހަކަފުޅު ދައްކަވަމުން ޔާމީން ވިދާޅުވެފައިވަނީ، މިއަހަރަށް ފާސްކުރި 49 ބިލިއަން ރުފިޔާގެ ބަޖެޓް އަދި ހުސްވެފައި ނުވާތީ، އިތުރު ފައިސާ ހޯދަން ގޮސްގެން ނުވާނެ ކަމަށެވެ.
އަދި ސަޕްލިމެންޓްރީ ބަޖެޓުގައި ޕީއެސްޕީއަށް ފައިސާ ހިމަނާފައިވާއިރު، މިއަހަރުގެ މަޖިލީހުން ފާސްކުރި ބަޖެޓުގައި ޕީއެސްއައިޕީ އަށް ހިމެނި 9 ބިލިއަން ރުފިޔާގެ ތެރެއިން މިހާތަނަށް ޚަރަދުކުރެވިފައިވަނީ ދެ ބިލިއަން ރުފިޔާ ކަމަށް ޔާމީން ފާހަގަކުރެއްވިއެވެ.
އަހަރު ނިމެން ބާކީ އޮތީ ދެ މަސްދުވަސް ކަމަށާއި، މި މުއްދަތުގައި ޕީއެސްއައިޕީ އަށް ދެ ބިލިއަން ރުފިޔާ ރާއްޖޭގެ އެއްވެސް ހިސާބެއްގައި ޚަރަދު ނުކުރެވޭނެ ކަމަށްވެސް ވިދާޅުވިއެވެ.
މީގެއިތުރުން، ސަޕްލިމެންޓްރީ ބަޖެޓުގައި ސަރުކާރުގެ ކުންފުނިތަކަށް 400 މިލިއަން ރުފިޔާ ހިމަނާފައިވާ ކަމަށް ފާޑުވިދާޅުވަމުން، އަހަރު ފަހުކޮޅު ކުންފުނިތަކަށް ދޭން އޮތީ ކޮން ސަބްސިޑީއެއްތޯ ސުވާލު އުފައްދަވައި، މި ފައިސާ ހިމަނާފައިވަނީ ސިޔާސީ ވަޒީފާތަކުން ވަކިކުރާ މީހުން ކުންފުނިތަކަށް ވައްދައި، އެ މީހުންނަށް މުސާރަ ދިނުމަށް ކަމަށް ޔާމީން ތުހުމަތުކުރެއްވިއެވެ.
ސަރުކާރުން ސަޕްލިމެންޓްރީ ބަޖެޓަކަށް ދާންޖެހޭ އެއްވެސް ސަބަބެއް ނެތް ކަމަށާއި، މި ބަޖެޓް މަޖިލީހުން ފާސްކުރުމުގެ ކުރިން ސަރުކާރު ޖަވާބުދާރީ ކުރުވަންޖެހޭ ކަމަށްވެސް ޔާމީން ވިދާޅުވިއެވެ.
