ފަލަސްތީނުގެ މިނިވަންކަމަށްޓަކައި ޖިހާދުކުރާ ހަމާސް ޖަމާއަތަކީ ޓެރަރިސްޓު ޖަމާއަތެއް ކަމަށް ވިދާޅުވެފައިނުވާނެ ކަމަށް، އިސްލާމިކް މިނިސްޓަރު ޑރ. މުޙައްމަދު ޝަހީމް ޢަލީ ސަޢީދު ވިދާޅުވެއްޖެއެވެ.
ޝަހީމް މިހެން ވިދާޅުވެފައިވަނީ، ސޯޝަލް މީޑިއާގައި ދައުރުވި ޕޯސްޓަކާ ގުޅިގެންނެވެ. އެ ޕޯސްޓުގައި ބުނެފައިވަނީ ހުކުރު ނަމާދަށްފަހު ހަމާސްގެ ލީޑަރު ޔަހްޔާ ސިމްވާރުގެ މައްޗަށް ޣައިބަށް ކަށުނަމާދު ކުރުމުގެ ހުއްދައަށް ގިނަ އިމާމުން އެދުނު ނަމަވެސް، ހަމާސްއަކީ ޓެރަރިސްޓް ޖަމާއަތެއް ކަމަށް ބުނެ ޝަހީމް ހުއްދަ ނުދެއްވި ކަމަށެވެ.
ޑރ. ޝަހީމް ވިދާޅުވެފައިވަނީ މި ޕޯސްޓުގައިވާ މަޢުލޫމާތަކީ ކަނޑައެޅިގެން ދޮގު ވާހަކަތަކެއް ކަމަށެވެ. ހަމާސްގެ ލީޑަރު ޔަހުޔާ ސިންވާރު ޝަހީދުކޮށްލާފައިވަނީ އިސްރާއިލުން ދިން ހަމަލާތަކެއްގައި މިދިޔަ ބުރާސްފަތި ދުވަހުއެވެ. އުމުރުން 61 އަހަރުގެ ސިންވާރު ޝަހީދުވީ އިސްރާއީލް ސިފައިންނާ ކުރިމަތިލެއްވުމުގައި އެންމެ ފަހު ވަގުތު ވެސް ހުންނަވަނިކޮށް ކަމަށް ވަނީ ހާމަވެފައެވެ.
މި މައްސަލައިގައި ދިވެހި ސަރުކާރުން އަދި ވަކި އެއްޗެއް ބުނެފައެއް ނުވެއެވެ. އަދި ޔަހުޔާ ސިންވާރުގެ މައްޗަށް ރާއްޖޭގެ މިސްކިތްތަކުގައި ކަށުނަމާދު ކޮށްފައެއްވެސް ނުވެއެވެ.
މީގެ ކުރިން ހަމާސްގެ ލީޑަރު ކަމުގައި ހުންނެވި އިސްމާއިލް ހަނިއްޔާ ޝަހީދުކޮށްލި މައްސަލައިގައިވެސް ސަރުކާރުން ވަކި ބަޔާނެއް ނެރެފައެއް ނުވެއެވެ. މި ހާދިސާއާ ގުޅިގެން އުފެދިފައިވާ ޚިޔާލުތަފާތުވުންތަކާއި ދެބަސްވުންތައް ދައްކުވައިދެނީ ފަލަސްތީނު މައްސަލައަކީ ދިވެހި މުޖުތަމަޢުގައި ވެސް ސަމާލުކަން ދެވޭ މުހިންމު މައްސަލައެއްކަމެވެ.
