ރާއްޖޭގައި ޑިވެލޮޕްމަންޓް ބޭންކެއް ހިންގުމަށް ޑިވެލޮޕްމަންޓް ބޭންކް އޮފް މޯލްޑިވްސް ލިމިޓެޑަށް ބޭންކިންގ ލައިސަންސް މޯލްޑިވްސް މަނިޓަރީ އޮތޯރިޓީ (އެމްއެމްއޭ) އިން ދޫކޮށްފިއެވެ.
ޑިވެލޮޕްމަންޓް ބޭންކް އޮފް މޯލްޑިވްސް ލިމިޓެޑަކީ 100 އިންސައްތަ ދިވެހި ސަރުކާރުގެ މިލްކިއްޔާތުގައިވާ ބޭންކެކެވެ.
ސެންޓްރަލް ބޭންކުން ނެރުނު ބަޔާނެއްގައި ބުނެފައިވަނީ ޑިވެލޮޕްމަންޓް ބޭންކް އޮފް މޯލްޑިވްސް ލިމިޓެޑުން ބޭންކިންގ ހިދުމަތް ފެށުމުން ދިގު މުއްދަތުގެ ފައިނޭންސިންގ ހިދުމަތްތައް ތައާރަފުކުރުމަށާއި ރާއްޖޭގެ އިގްތިސާދީ ދުވެލި އިތުރުކުރުމަށް މަގުފަހިވާނެ ކަމަށް އެމްއެމްއޭ އިން ގަބޫލުކުރާ ކަމުގައެވެ.
އެމްއެމްއޭ އިން އިތުރަށް ބުނެފައިވަނީ މި ބޭންކުން 12 އޮކްޓޯބަރު 2025 ގެ ކުރިން ބޭންކިންގ ހިދުމަތް ފަށަން ޖެހޭނެ ކަމަށެވެ.
މިއީ ރާއްޖޭގެ މާލީ ދާއިރާ ފުޅާކޮށް ތަރައްގީކުރުމަށް އެޅޭ މުހިންމު ފިޔަވަޅެއް ކަމަށް އެމްއެމްއޭ އިން ބުނެފައިވެއެވެ.
މި ދަނޑިވަޅުގައި، އިގްތިސާދީ ވަޒީރު މުހައްމަދު ސައީދު މިއަދު ވިދާޅުވެފައިވަނީ ރާއްޖޭގައި ޑިވެލޮޕްމަންޓް ބޭންކިންގ އަށް ފުރަތަމަ ލައިސަންސް ހޯދުމަކީ ސަރުކާރަށް ލިބޭ ޝަރަފެއް ކަމަށެވެ.
އެކްސްގައި ކުރެއްވި ޕޯސްޓެއްގައި އޭނާ ވިދާޅުވެފައިވަނީ މިއީ ރައީސް ޑރ. މުހައްމަދު މުއިއްޒުގެ ވިސްނުންފުޅާއި ރައީސް ކަނޑައަޅުއްވާފައިވާ އިގްތިސާދީ ތަރައްގީގެ ވިސްނުމާ އެއްގޮތަށް ގައުމަށް ލިބުނު ތާރީހީ ކާމިޔާބީއެއް ކަމަށެވެ.