މާފުއްޓަށް މިއަހަރު މިހާތަނަށް ރެކޯޑު އަދަދަކަށް ޓޫރިސްޓުން ޒިޔާރަތް ކޮށްފިއެވެ.
މާފުށި ކައުންސިލުން ހާމަކުރި ގޮތުގައި މިދިޔަ މަހުގެ ނިޔަލަށް އެ ރަށަށް 135،000 އަށް ވުރެ ގިނަ ފަތުރުވެރިން ޒިޔާރަތްކޮށްފައިވެއެވެ. މިއީ އެ ރަށަށް އެއް އަހަރެއްގެ ތެރޭގައި ޒިޔާރަތްކުރި އެންމެ ގިނަ ފަތުރުވެރިންގެ އަދަދެވެ. މާފުށި ކައުންސިލްގެ ރައީސް ހަސަން ސޮލާހް ވިދާޅުވި ގޮތުގައި މިއީ ރާއްޖެއަށް މިހާތަނަށް އައި ފަތުރުވެރިންގެ ގާތްގަނޑަކަށް 10 އިންސައްތައެވެ. މިއަހަރުގެ މިހާތަނަށް ރާއްޖެއަށް 1.5 މިލިއަނަށް ވުރެ ގިނަ ފަތުރުވެރިން ޒިޔާރަތްކޮށްފައިވާއިރު، މިއަހަރު ނިމޭއިރު މާފުއްޓަށް 200،000 ފަތުރުވެރިން ޒިޔާރަތްކުރާނެކަމަށް ބެލެވެއެވެ. އަދި އަންނަ އަހަރު 300،000 ފަތުރުވެރިން މާފުއްޓަށް ގެނައުމަކީ އެރަށުގެ ޓާގެޓެވެ.
މާފުއްޓަށް އަންނަ ފަތުރުވެރިން އެންމެ ގިނައިން ތިބެނީ ކާނި ހޮޓެލްސް، އެރީނާ ހޮޓެލްސް، އަދި ޓްރައިޓަން ގެސްޓްހައުސްތަކުގައެވެ. މި ކުންފުނިތަކަކީ މާފުށީގައި އެންމެ ފުޅާ ދާއިރާއެއްގައި ގެސްޓްހައުސްގެ ވިޔަފާރި ކުރަމުންދާ ކުންފުނިތަކެވެ. ސެޕްޓެމްބަރު މަހުގެ ނިޔަލަށް ކާނި ހޮޓެލްސްގެ ގެސްޓްހައުސްތަކަށް 31،230 ފަތުރުވެރިން، އެރީނާއަށް 29،474 ފަތުރުވެރިން، އަދި ޓްރައިޓަންއަށް 13،976 ފަތުރުވެރިން ޒިޔާރަތްކޮށްފައިވެއެވެ.
މާފުއްޓަކީ ރާއްޖޭގެ ރަށްތަކުގެ ތެރެއިން ލޯކަލް ޓޫރިޒަމްގެ ވިޔަފާރި އެންމެ ފުޅާ ދާއިރާއެއްގައި ކުރާ ރަށެވެ. ނަމަވެސް، ދައުލަތަށް އެތައް މިލިއަން ޑޮލަރެއް ލިބުނު ނަމަވެސް، މާފުށީގެ ރައްޔިތުން އެދޭ މިންވަރަށް އެރަށް ތަރައްޤީވެފައި ނެތުމަކީ އެމީހުންގެ ބޮޑު ކަންބޮޑުވުމެކެވެ.
