ދުނިޔޭގެ އަޚުލާގު ހަލާކުވެ ފާސިދުވެގެން ދިޔައީ ﷲގެ މަންހަޖާއި އެކަހެރި ވުމުގެ ސަބަބުން ކަމުގައި މިއަދުގެ ހުކުރު ޚުޠުބާގައި ވިދާޅުވެއްޖެއެވެ.
"ޒިނޭ ކުރުމާއި ފާހިޝް އަމަލުތަކުގެ ނުބައިކަން" މިމައުޟޫއަށް ޚާއްސަ ކުރެވިގެންދިޔަ މިއަދުގެ ހުކުރު ޚުޠުބާގައި ވިދާޅުވީ، ދުނިޔޭގެ އަޚުލާގު ހަލާކުވެ ފާސިދުވެގެން ދިޔަދިއުމަކީ ކުއްލިއަކަށް ވީކަމެއް ނޫންކަމަށާއި، އެއީ ލަދުވެތި އިންސާނީ ކަރާމާތު ވަޅުލުމުގެ ނަތީޖާ ކަމުގައެވެ.
އެއީ މިނިވަންކަމުގެ ދަޅާގައި ޖެހި، ތިމާގެ ލަގަން ތިމާގެ ހަވާނަފްސަށް މުޅީން ދޫކޮށްލުމުގެ މުސީބާތެވެ. އިސްލާމްދީން ވަނީ މިފަދަ ވަބާތަކުން ސަލާމަތްވާނެ މަގުތައް ދައްކަވާފައެވެ. ﷲގެ އަމުރުފުޅުތަކަށް ތަބާވެ، މުންކަރާތްތަކާ ދުރުހެލި ވުމުންނެވެ.
މިއަދުގެ ޚުޠުބާގައި ވިދާޅުވެފައި ވެއެވެ.
ޚުޠުބާގައި އިތުރަށް ވިދާޅުވި ގޮތުގައި ފާހިޝް އަމަކުތަކުން މުޖުތަމަޢު ސަލާމަތް ކުރެވޭނީ މައިންބަފައިންނާއި، ތައުލީމުދޭ މުވައްސަސާތަކާއި، ޚަބަރު ފަތުރާ ވަސީލަތްތަކުން އެ ފަރާތްތަކުގެ މަސްއޫލިއްޔަތު ފުރިހަމަޔަށް އަދާކޮށްގެން ކަމުގައެވެ. އަދި އެމަގުސަދު ހާސިލް ކުރެވޭނީ ޒުވާނުން ރަގަޅަށް ތަރިބިއްޔަތު ކޮށްގެންނާއި، އެމީހުންގެ އަތުގައި ޝައިޠާނާ ހިފުން މަނާކޮށްގެން ކަމުގައިވެސް މިއަދުގެ ޚުޠުބާގައި ވިދާޅުވެފައި ވެއެވެ.
ޚުޠުބާގައިވަނީ، ޒިނޭއާއި ފާހިޝް އަމަލުތަކުން ދުރުވެގަތުމަށްޓަކާ ނަމާދު ގާއިމް ކުރުންމަތީ ދެމި ތިބުމަށް ގޮވާލާފައެވެ. އަދި ކައިވެނި ކުުރުމަށް ކުޅަދާނަކަން ލިބިގެންވާމީހާ ކައިވެނި ކުރުމަށާއި، ކައިވެނި ކުރުމަށް ކުޅަދާނަކަން ލިބިގެން ނުވާމީހާ ސުންނަތް ރޯދަ ހިފުމަށް ޚުޠުބާގައި ނަސޭހަތްތެރި ވެފައި ވެއެވެ.
އަދި ފާހިޝް އަމަލުތަކަށް އަރައިގަނެވިފައިވާމީހުން ތައުބާ ވުމަށްވެސް ޚުޠުބާގައި ނަސޭހަތްތެރި ވެފައި ވެއެވެ.
