ރާއްޖެއަށް މިހާރު ކުރަމުންދާ ވިއްސާރައިގެ ހާލަތު މި ހަފުތާގެ ނިޔަލަށް ދެމިގެންދާނެ ކަމަށް މޫސުމާބެހޭ ޤައުމީ އިދާރާ (މެޓް އޮފީސް) އިން ލަފާކޮށްފިއެވެ. މެޓް އޮފީހުން ހާމަކޮށްފައިވާ ގޮތުގައި ކުރިއަށް އޮތް 24 ގަޑިއިރު އަދި އޭގެ ފަހުން އަންނަ ދެތިން ދުވަހު މޫސުން ގޯސްވެ، ކަނޑުތައް ގަދަވާނެ ކަމަށް ބެލެވެއެވެ.
ރާއްޖޭގެ އެކި ސަރަޙައްދުތަކަށް ބޯކޮށް ވާރޭވެހި، ވިއްސާރަވެ އަދި ގުގުރާނެ ކަމަށް ލަފާކުރެވޭއިރު، ވައިގެ ބާރުމިން ސަރަޙައްދުތަކާ އެއްގޮތަށް ތަފާތުވާނެއެވެ. ހުޅަނގު ދެކުނާއި، ހުޅަނގާއި، އުތުރު އަދި މެދު ރާއްޖެތެރޭގެ އަތޮޅުތަކަށް ގަޑިއަކު 15 މޭލާއި 25 މޭލާ ދެމެދުގެ ބާރުމިނުގައި ވައި ޖެހޭނެ ކަމަށް ލަފާކުރެވޭއިރު، ދެކުނުގެ އަތޮޅުތަކަށް ގަޑިއަކު 13 މޭލާއި 23 މޭލާ ދެމެދުގެ ބާރުމިނުގައި ވައި ޖެހޭނެ ކަމަށް ބެލެވެއެވެ. ވިލާގަނޑުގައި ވައިގެ ބާރުމިން ގަޑިއަކު 45 މޭލަށް އަރާފާނެ ކަމަށްވެސް މެޓް އޮފީހުން ލަފާކުރެއެވެ.
ކަނޑުގެ ޙާލަތަށް ބަލާއިރު، މެދު ރާއްޖެތެރެ އާއި އުތުރުގެ ކަނޑުތަކުގައި ރާޅުގެ އުސްމިން 8 ފޫޓަށް އަރާނެ ކަމަށް ލަފާކުރެވޭއިރު، ދެކުނުގެ ކަނޑުތަކުގައި ރާޅުގެ އުސްމިން 7 ފޫޓު ހުންނާނެ ކަމަށް ބެލެވެއެވެ. މި ނުރައްކާތެރި ޙާލަތާ ގުޅިގެން، މެޓް އޮފީހުން ވަނީ މިއަދު މެންދުރު 1:30 އިން އިރުއޮއްސި 7:30 އާ ހަމައަށް މުޅި ރާއްޖެއަށް ހުދު ސަމާލު ނެރެފައެވެ.
މިހާރު ކުރަމުންދަނީ ހުޅަނގު މޫސުމުގެ ވިއްސާރަ ކަމަށް ފާހަގަކުރައްވައި، މެޓް އޮފީހުން ވަނީ އެންމެހައި ރައްޔިތުންނަށް މޫސުމަށް ސަމާލުވުމަށް އިލްތިމާސްކުރައްވާފައެވެ. ޚާއްޞަކޮށް ކަނޑު ދަތުރުފަތުރުކުރާ ފަރާތްތަކުން މޫސުމުގެ ޙާލަތަށް ވަރަށް ބޮޑަށް ސަމާލުވެ، ރައްކާތެރިކަމުގެ ފިޔަވަޅުތައް އެޅުމަށް އެ އޮފީހުން އިލްތިމާސްކޮށްފައިވެއެވެ.
