ކުޑަކުއްޖަކަށް ޖިންސީ ގޯނާކުރި މައްސަލައެއްގައި ކުރިން ކުށް ސާބިތުނުވާ ކަމަށް ނިންމާފައިވާ ހުކުމެއް ބަދަލުކޮށް، ހައިކޯޓުން މިއަދު 15 އަހަރުގެ ޖަލު ހުކުމެއް އިއްވައިފިއެވެ.
މި މައްސަލައިގައި ދަށު ކޯޓުން ކުރި ހުކުމް ބަދަލުކުރަން އެދި ޕްރޮސިކިއުޓަރ ޖެނެރަލްގެ އޮފީހުން ހައިކޯޓުގައި އިސްތިއުނާފު ކުރުމުން މިގޮތަށް ނިންމާފައިވަނީއެވެ.
ހައިކޯޓުން އާންމުކުރި ހުކުމުގެ ޚުލާސާގައި ބަޔާންކޮށްފައިވާ ގޮތުގައި، ޔޫސުފް މޫސާ ނަމަކަށް ކިޔާ މީހަކު 2009 އިން 2021 އާ ހަމައަށް ކުޑަކުއްޖަކަށް އެކި ބާވަތުގެ ޖިންސީ ގޯނާ ކޮށްފައިވެއެވެ. ކުއްޖާގެ ސައިކޮލޮޖިކަލް ރިޕޯޓުން ދައްކާގޮތުގައި، ކުއްޖާއަށް ނަފްސާނީ ގޮތުން ކޮށްފައިވާ އަސަރުތަކަކީ ޔޫސުފް މޫސާގެ ފަރާތުން ލިބުނު ޖިންސީ އަނިޔާގެ ސަބަބުން ކަމަށް ފާހަގަކުރެވިފައިވެއެވެ.
މީގެއިތުރުން، ކުއްޖާގެ އާއިލާގައި ޖެހިފައިވާ މައްސަލަތަކަކީ އޭނާއާ ހެދި ކަމަށް ކުއްޖާއަށް ގަބޫލުކުރެވޭކަމާއި، އެކަމާ ވިސްނާ އަދި އެހެން މީހުން ކުއްޖާއާމެދު ދެކޭނެ ގޮތާމެދު ކުއްޖާ ކަންބޮޑުވާކަން ވެސް ރިޕޯޓުން ހާމަވެފައިވެއެވެ. މި ހެކިތަކުގެ އަލީގައި، އިތުބާރު ހިފޭ މަޤާމެއްގައި ހުރެ ކުޑަކުއްޖަކާމެދު ޖިންސީ ޢަމަލު ހިންގުމުގެ ކުށް ޔޫސުފް މޫސާގެ މައްޗަށް ސާބިތުވާ ކަމަށް ހައިކޯޓުން ނިންމާފައިވެއެވެ.
ހައިކޯޓުން ކުރި ހުކުމުގައި ޔޫސުފް މޫސާ 15 އަހަރަށް ޖަލަށްލުމަށް އަމުރުކޮށްފައިވީ ނަމަވެސް، އޭނާ މިހާތަނަށް 10 މަހާއި 20 ދުވަސް ޖަލުގައި ހޭދަކޮށްފައިވާތީ، ދެން އޭނާ ޖަލުގައި ހޭދަކުރަންޖެހޭނީ 14 އަހަރާއި އެއް މަހާއި 10 ދުވަހެވެ.
