ދުނިޔޭގެ އެންމެ ބޮޑު ކަނޑު ދަތުރުފަތުރުގެ ކުންފުނީގެ ބޯޓެއް ރާއްޖެއަށް ބަނދަރުކޮށްފައިވާކަމަށް މޯލްޑިވްސް ޕޯޓްސް ލިމިޓެޑް (އެމްޕީއެލް) އިން ހާމަކޮށްފިއެވެ.
"އެމްއެސްސީ މަނާސާ އެފް" ގެ ނަމުގައި މި ބޯޓު އިއްޔެ ރާއްޖެއަށް ޒިޔާރަތްކުރި ވަގުތު، އެމްޕީއެލްގެ ފަރާތުން ވޯޓަރ ސެލިއުޓުގެ މަރުޙަބާއެއްވެސް މި ބޯޓަށް ކިޔާފައެވެ.
މި ބޯޓު ރާއްޖެ އައުމާ ގުޅިގެން، އެމްޕީއެލްއާއި އެމްއެސްސީގެ ރާއްޖޭގެ އޭޖެންޓް ކަމުގައިވާ ސެންޗޫރިއަން ގުޅިގެން މިއަދު ހެނދުނު މާލޭ ވިޔަފާރި ބަނދަރުގައި ރަސްމިއްޔާތެއް ބާއްވާފައިވެއެވެ. މި ރަސްމިއްޔާތުގައި ބޯޓުގެ ކެޕްޓަނަށް ހަނދާނީ ފިލައެއް ހަވާލުކޮށްދެވުނެވެ.
ރަސްމިއްޔާތުގައި ވާހަކަފުޅު ދައްކަވަމުން އެމްޕީއެލްގެ ސީއީއޯ މުޙައްމަދު ވަޖީހު އިބްރާހީމް، އެމްއެސްސީގެ ދަތުރުތައް ރާއްޖެއަށް ގެނައުމަށް ސެންޗޫރިއަނުން ކޮށްފައިވާ މަސައްކަތަށް ޝުކުރު އަދާކުރެއްވިއެވެ. އަދި މާލޭ ވިޔަފާރި ބަނދަރުގެ ޚިދުމަތްތައް އިތުރަށް ރަނގަޅުކުރުމަށް މިހާރުވެސް ގިނަ މަސައްކަތްތަކެއް ކުރަމުންދާކަން ފާހަގަކުރެއްވިއެވެ.
އެމްޕީއެލްއިން ހާމަކުރި މަޢުލޫމާތުގައިވާ ގޮތުން، މި ބޯޓުގައި ރާއްޖެއަށް ގެނެވިފައިވަނީ 800 ކޮންޓެއިނަރެވެ. މި ހުރިހާ ކޮންޓެއިނަރެއްގައިވެސް އެކުލެވިގެންވަނީ އާންމު މުދާ ނުވަތަ ޖެނެރަލް ކާގޯއެވެ.
