މާލޭ ރައްޔިތުންގެ ހާލަތު ދެނެގަތުމަށް "ރައްޔިތުންނާ ގާތުން" ނަމުގައި ސާވޭއެއް މާލެ ސިޓީ ކައުންސިލުން މިއަދު ފަށައިފިއެވެ. މި ސާވޭ ކުރިއަށް ގެންދަނީ މާލެ ސިޓީގެ އަންހެނުންގެ ތަރައްޤީއަށް މަސައްކަތްކުރާ ކޮމިޓީންނެވެ. ސާވޭގެ މަޤްޞަދަކީ އެހީތެރިކަން ބޭނުންވާ ރައްޔިތުންގެ ހާލަތު ދެނެގަނެ، އެފަރާތްތަކަށް ކައުންސިލުން އެހީތެރިކަން ފޯރުކޮށްދިނުމެވެ.
މާލޭ މޭޔަރު އާދަމް ޢާޡިމް ވިދާޅުވެފައިވަނީ ކައުންސިލްތަކުން ރައްޔިތުންގެ ގާތަށް ގޮސް، އެފަރާތްތަކުގެ ހާލު ބެލުމަކީ ކޮންމެ ދުވަހަކުވެސް ކުރަންޖެހޭ ކަމެއްކަމަށެވެ. މި ސާވޭއިން ލިބޭ މަޢުލޫމާތުގެ އަލީގައި އެކި ގޭބިސީތަކުގައި ދިރިއުޅޭ އެހީތެރިކަމަށް ބޭނުންވާ ފަރާތްތައް ދެނެގަނެވި، އެފަރާތްތަކަށް އެހީތެރިވެދިނުމަށް ކައުންސިލުން ކުރަންޖެހޭ ކަންތައްތައް ފާހަގަކުރެވޭނެކަމަށް މޭޔަރު ވިދާޅުވިއެވެ.
ކައުންސިލުގެ އެންމެ މުހިންމު މަޤްޞަދަކީ އަޅާލާ އޯގާތެރި މުޖުތަމަޢެއް ބިނާކުރުންކަމަށް މޭޔަރު ފާހަގަކުރެއްވިއެވެ. އަދި ސާވޭއަށް ރައްޔިތުން ތެދު އަދި ފުރިހަމަ މަޢުލޫމާތު ދިނުމަށް އެދިވަޑައިގަތެވެ.
ސިޓީ ކައުންސިލުން ހާމަކުރިގޮތުގައި މި ސާވޭގެ މަސައްކަތް ކުރިއަށްދާނީ ކޮންމެ ހަފުތާއެއްގެ ހޮނިހިރު، އާދީއްތަ އަދި ބުދަ ދުވަހު ދެ ދަންފަޅިއަށް ބަހާލައިގެންނެވެ. މި މަސައްކަތުގައި މާލެ ސިޓީގެ 18 ދާއިރާ ބައިވެރިވާނެއެވެ. އަދި 6 މަސްދުވަހުގެ މުއްދަތަށް ބަހާލައިގެން، ފަހަރަކު ދާއިރާއެއް ނިންމަމުން ގޮސް، ހުރިހާ ދާއިރާއަކަށް އަންހެނުންގެ ކޮމިޓީގެ މެންބަރުން ޒިޔާރަތްކުރާ ގޮތަށް ވަނީ ހަމަޖެހިފައެވެ.
މޭޔަރު އަމިއްލަފުޅަށްވެސް މި ސާވޭގައި ޢަމަލީގޮތުން ބައިވެރިވެވަޑައިގަންނަވާނެއެވެ.
